SQO-da bıyl 100-ge jýyq zeınetker pılottyq joba aıasynda qamqorlyqqa alyndy

<p>PETROPAVL. KAZINFORM &ndash; Soltústik Qazaqstan oblysynda 5 myńnan astam jalǵyzilikti zeınetker turady. Onyń basym bóligi &ndash; kómekke muqtaj. Qarttar aılyǵynda óńirde ásirese turmys jaǵdaıy nashar, múgedektigi bar egde jastaǵy adamdar nazarǵa alynbaq.</p>

SQO ardagerler keńesiniń málimetinshe, qazir oblysta 102 myń 456 zeınetker turady. Sonyń 44 myńǵa jýyǵy Petropavl turǵyny. 556 bastaýysh ardagerler uıymy jumys isteıdi, sondaı-aq, 14 óńirlik ardagerler keńesi bar. 

«Qazirgi ýaqytta tek 3 soǵys ardageri ǵana qaldy. Olardyń barlyǵy Petropavlda turady, 97, 98 jastaǵy maıdangerler jáne bireýi 102-degi keıýana. 2517 adam – tyl eńbekkeri. 10 adam kontslager tutqyny, 5 adam – Lenıngrad qursaýynda bolǵan jáne 101 adam soǵys ardagerleriniń jesiri. 

Budan bólek jalǵyzilikti 5 myńnan astam zeınetkerimiz bar.

Qarttar aıynyń negizgi maqsaty – osyndaı jalǵyz ózi turatyn, áljýaz, turmys jaǵdaıy tómen adamdarǵa úılerine baryp kómektesý», - deıdi SQO ardagerler keńesiniń tóraǵasy Eskendir Eleýsizov. 

Merekege oraı bıyl óńirde oblystyq densaýlyq saqtaý basqarmasymen ashyq esik kúnin ótkizý josparlanǵan. Zeınetkerlerdi barynsha qamtyp, densaýlyqtaryn tekserýge, medıtsınalyq kómek alýǵa jaǵdaı jasalynbaq. Qajet bolǵan jaǵdaıda, medıtsınalyq mamandar qarttardyń úılerine de barady.

«Qarttar aıynyń bir ereksheligi – egde jastaǵy adamdarymyzǵa bir sát nazar aýdarý, nege muqtaj, anyqtap, kómektesý. Mysaly aýyldy jerde turatyn zeınetkerlerge ne kerek, otyn-kómir, shóp kerek. Múmkin úıiniń mańaıyn tazalap berý kerek shyǵar. 

Ekinshi Dúnıejúzilik soǵys ardagerlerine, tyl eńbekkerlerine bekitilgen adamdar bar. Olarǵa jyl boıyna kómek kórsetilip, nazarda ustap otyramyz. 

Bıyl oblys boıynsha óte muqtaj 96 adamdy anyqtadyq. Olarǵa bir rettik kómek kórsetip qoımaı, ómir boıyna qamqorlyqqa alyp otyrmyz. Bul – pılottyq joba», - deıdi Eskendir Eleýsizov.

Oblystyq ardagerler keńesi tóraǵasynyń aıtýynsha, zeınetker nemese ardager degende olardyń barlyǵy kómekke muqtaj degen pikir qalyptaspaýy kerek. Sol sebepti merekege oraı túrli mádenı is-sharalardy uıymdastyrý da josparda bar. Shahmat, doıby, toǵyzqumalaqtan jarystar da uıymdastyrylmaq.

«Halqymyzdyń qanyna sińgen ádet, ulttyq dúnıetanym, ulttyq qundylyqqa baılanysty úlkenderge qurmet kórsetý - ol halqymyzdyń eń bir jaqsy qasıetteriniń biri. Qazan aıynda barlyǵy, ásirese qyzmet istep jatqan azamattar ata-anasyna, egde jastaǵylarǵa qamqorlyq kórsetýi tıis. Soǵys jyldary «Eren eńbegimen» medalin alǵan 35 adam Petropavlda turady. Qalada múgedektigi bar 10 myń adam turady. 8 myń adam eń tómengi mólsherdegi zeınetaqy alady. Osy adamdarǵa kómek kórsetý bizdiń azamattyq paryzymyz ǵoı. Munymen tek ákimshilik, ardagerler keńesi ǵana aınalyspaý kerek. Árkim óziniń ata-anasynan bastasa», - deıdi Petropavl qalalyq ardagerler keńesiniń tóraǵasy Jangeldi Tájın. 

Buǵan deıin SQO-da jyl basynan beri elektr jelilerinde 1,2 myńnan astam apat tirkelgenin jazǵan edik.