SQO-da bıyl 100-den astam jaıaý adamdy kólik qaǵyp ketken

<p>Petropavlda jaıaý júrginshilerdiń ótkelderine jaryqdıodty jol belgileri ornatylyp jatyr. Polıtsııa osylaısha turǵyndardyń qaýipsizdigin qamtamasyz etpek. Tek bıyl oblysta 113 júrginshini kólik qaǵyp ketken, deıdi <a href="https://kaz.inform.kz/" target="_blank" rel="noopener">Kazinform</a>.</p>

SQO polıtsııa departamentiniń málimetinshe, óńir joldarynda jyl basynan beri 327 jol-kólik oqıǵasy tirkelgen, onyń 113-inde jaıaý júrginshiler kólik qaqqan. 

Jol apatynyń 25-i jaıaý júrginshilerdiń kinásinen bolǵan.

Júrgizýshilerdiń joldaǵy tártibin arttyrýǵa baǵyttalǵan reıdterden bólek, tártip saqshylary jol-kólik ınfraqurylymyn jaqsartý jumystaryna den qoıdy.

Ótken aptadan bastap polıtseılerdiń usynystary boıynsha oqý oryndary men adam kóp jınalatyn oryndarǵa jaqyn ornalasqan Petropavl kóshelerinde jol belgileri jańartyla bastady. Jol belgileri jaryqdıodty shamdarmen jabdyqtalǵan.

Bul olardy qarańǵy ýaqytta, kez kelgen aýa raıynda anyq kórýge múmkindik beredi. Jergilikti turǵyndar bul jańashyldyqty tolyǵymen qoldap jatyr.

«Bul jerden balalar jıi ótedi. Jańa úıler salynyp jatyr. Jaqyn jerde sýpermarket te bar. Jaqsy jasalǵan. Endi júrgizýshilerge muqııat bolý kerek», - deıdi Petropavl turǵyny Kenjebaı Muqataev.

Oblys ortalyǵynyń jol jelisinde jaryqdıodpen jaryqtandyrylǵan barlyǵy 46 jaıaý júrginshi ótkeli ornatylǵan. Qazir taǵy 10-y iske qosylady.

«Jańa oqý jylynyń qarsańynda mektepter men kolledjderdiń manyńda 15 qosymsha jasandy kedergi, qajetti jol belgileri ornatylyp, olar aǵymdaǵy jóndeýden ótti. Sondaı-aq jol ústine tańbalar salynýda. Polıtsııa departamenti oblys ákimdigimen birlesip jol qozǵalysy jaǵdaıyn jaqsartý boıynsha turaqty negizde jumys júrgizedi», - deıdi SQO PD ákimshilik polıtsııa basqarmasynyń bastyǵy Serik Áljanov.