SQO-da bıg-beg óndirisin jolǵa qoıǵan zaýyt keler jyly tolyq qýatynda iske kirisedi
«SMBGROUP Family» JShS bıyl sáýir aıynda bıg-beg shyǵaratyn zaýytty ashty. Bıg-beg, ıaǵnı sýsymaly ónimge arnalǵan polıpropılen qaptary negizinen qurylys, aýyl sharýashylyǵy salalarynda, taý-ken óndirisinde qoldanylady. Bir qapqa 1,5 tonna ónim syıady. Al bıg-begke qoldanylatyn materıal jaýyn-shashynǵa, ylǵalǵa, kez kelgen temperatýraǵa tózimdi keledi.
«Karantın bizge kedergi bolǵan joq. Qazir damý ústindemiz. Jańa qondyrǵyǵa tapsyrys berdik. Kásiporynnyń qýatyn arttyryp jatyrmyz. Karantın ýaqytynda birde-bir adamdy qysqartqanymyz joq. Kerisinshe shtatty úlkeıtip, jumysqa mamandardy alyp jatyrmyz. Eńbekaqyny keshiktirgenimiz joq, jumys protsesi úzilmedi», - deıdi «SMBGROUP Family» JShS bas dırektory Azamat Eleýsizov.
Jańa óndiristi ashpas buryn kásipkerler bes jylǵa jýyq naryqty zerttegen. Mundaı qaptar qazirgi ýaqytta Qazaqstannyń tórt óńirinde ǵana shyǵarylady. Suranys joǵary.
Mamandardyń aıtýynsha, eldegi bıg-begke qajettiliktiń 60% Reseı ótep otyr.
«Tolyq qýatta jumys isteýge kóshken jaǵdaıda jumysshylardyń sany qazirgi 90-nan 130-ǵa jetedi. Memlekettiń qoldaýymen kásiporynǵa ınfraqurylymdy tartpaqshymyz. Ótinish berdik. Qajetti jobalyq-smetalyq qujattar daıyn. Saraptamadan óttik. Sondaı-aq memlekettiń kómegimen ǵımaratqa jylý jelisin tartýdy josparlap otyrmyz», - deıdi Azamat Eleýsizov.
Kásipkerler bıg-beg óndirisin jolǵa qoıý úshin oblys ortalyǵynda on jyldan artyq bos turǵan úsh ǵımaratty satyp aldy. «Damý-Óndiris» jeke kásipkerlik sýbektilerine qoldaý kórsetý baǵdarlamasy aıasynda 6% mólsherlememen 300 mln teńge shamasynda nesıe aldy. Shyǵarylatyn ónimniń sapasy joǵary, qapshyqtar bir-bireýiniń quny 6 myń dollar turatyn japondyq tigin mashınasymen tigiledi. Al shıkizat Reseıden jetkiziledi. Jaqynda kásiporynǵa jańa qondyrǵylar jetkizilmek.
Jalpy bıg-beg shyǵaratyn zaýyt 2021 jyly tolyq qýatynda jumys isteýge kóshpek.