SQO-da bıeniń qurǵaq sútin shyǵaratyn kásiporyn salynyp jatyr
Qazir bul aýylda 5,2 ga aýmaqta qurylys júrip jatyr. Jańa zaýyt bıyl tamyz aıynda paıdalanýǵa berilmek.
«Sever Agro LTD» JShS dırektorynyń orynbasary Armantaı Ábilovtiń aıtýynsha, nysannyń jalpy aýmaǵy 2 myń sharshy metr bolady.
— Bul ıdeıa Germanııanyki. Shet elde qurǵaq sút shyǵaratyn kásiporyn bar. Soǵan qarap, bizde ózimizde sondaı zaýyt ashýdy josparladyq. Joba quny 2,5 mlrd teńge, sonyń 1,5 mlrd teńgesi «Soltústik» ÁKK» AQ arqyly berildi. Bul — respýblıka boıynsha bizdiń ekinshi kásipornymyz. Qostanaı oblysynda bizdiń dál osyndaı zaýytymyz bar, ol tabysty jumys istep jatyr. Ónimge suranys joǵary. Qazir ónimdi eksportqa daıyndap jatyrmyz. Germanııaǵa, Qytaıǵa jiberý josparda bar. Germanııada, máselen bizdiń ónimdi qoldanyp kosmetıka óndirmek. Qazirgi ýaqytta qujattarmen jumys istep jatyrmyz, — deıdi Armantaı Ábilov.
Qazirgi ýaqytta qurylysta 50 adam eńbek etip jatyr. Qondyrǵyǵa tapsyrys berildi, kóktemde ákelinedi. Zaýyt ashylyp, iske kirisken kezde 15-20 adam jumysqa alynbaq.
— Saýmaldyń aǵzaǵa paıdasy óte kóp. Biraq sol paıdasyn kórý úshin saýǵannan keıin ony 2-3 saǵat ishinde ishý kerek. Eń basty qurylǵy — sýblımator, saýylǵan sút pasterızatsııadan ótedi, keıin tómen temperatýrada ony qatyrady. Sosyn sút quramyndaǵy ylǵal joıylyp, nátıjesinde qurǵaq sút qalady. Bul jumystyń bárin jańaǵy sýblımator atqarady, — deıdi Armantaı Ábilov.
Bıeniń qurǵaq súti 100, 200 gr jáne kelilik qaptamada shyǵarylmaq.
Buǵan deıin SQO-da sıyr men jylqy terileri iske jarap, odan proteın óndirilip jatqanyn jazǵan edik.