SQO-da bes jyl boıy kúrdeli jóndelgen shıpajaı bıyl paıdalanýǵa berilmek
Em izdegen, densaýlyǵyn saýyqtyrǵysy kelgen SQO turǵyndary qazir kóbine elimizdiń basqa óńirlerindegi sanatorıılerdi tańdap júr. Petropavlda búgingi tańda osy sanatqa jatatyn eki mekeme bar. Onyń biri «Solnechnyı» profılaktorııi bolsa, ekinshisi – «Transsıb» sanatorıı-profılaktorııi. Emdik qasıeti mol tabıǵı oryndarda ornalaspaǵandyqtan, kópshilik olar jaıynda bile bermeıdi.
SQO-da óziniń sulýlyǵymen, jasyl jelegimen, taza aýasymen, emdik qasıeti mol sýy jáne laıymen qazaqstandyqtar ǵana emes, kórshi elderdiń, sonyń ishinde reseılikterdiń arasynda tanymal sanatorıı bolǵan. Qyzyljar óńiriniń «injýine» aınalǵan Shalqar-Imantaý kýrorttyq aımaǵynda ornalasqan «Neftıannık» dep atalǵan bul sanatorııdiń qurylysy Shalqar kóliniń jaǵalaýynda 1973 jyly bastalyp, tek alty jyldan keıin ǵana paıdalanýǵa beriledi. 4 ga astam aýmaqty alyp jatqan emdeý-saýyqtyrý orny osy aralyqta qoldan-qolǵa ótti. Máselen 2000 jyly ol Kókshetaý munaı bazasyna qarap, ataýy «Shalqar Sý» bolyp ózgertildi. 2005 jyly Qazaqstan Respýblıkasynyń Іshki ister mınıstrligi satyp alyp, ataýyn «Arqa» dep ózgertip, vedomstvolyq sanatorııge aınaldyrdy. Shıpajaı 2016 jylǵa deıin mınıstrlikke qarady. Iesi jıi aýysqandyqtan durys kútim bolmady, osy jyldar ishinde bir ret te kúrdeli jóndeý júrgizilmegen.
Shalqar-Imantaý kýrorttyq aımaǵy Qazaqstanda týrızm damytylýy tıis TOP-10 tizimine kirýine baılanysty ınvestor kelip, toz-tozy shyqqan shıpajaıdy jańǵyrtýdy qolǵa aldy. Jospar boıynsha byltyr jazda paıdalanýǵa berilýi tıis edi.
«Shıpajaıda eki jatyn korpýsy, laımen emdeý, ashana, ákimshilik ǵımarat, jeke qazandyǵy men saýnasy bar. Barlyq ǵımarat sapaly salynǵan. Uńǵyma, sý jelisi, ortalyqtandyrylǵan káriz júıesi bar, elektr qýatymen qamtylǵan. Jalpy nysan 120 emdelip-demalýshyǵa arnalǵan. 4 - lıýks, 8 – jartylaı lıýks; 3 oryndyq 12 bólme, 2 oryndyq - 12 bólme bar. Jóndeý jumysy aıaqtalýǵa jaqyn. Qazirgi ýaqytta jańadan qazandyq salyndy. Sý jelisi jańǵyrtylyp, eki jatyn korpýsqa jylý trassasy tartyldy. Іshki árleý jumystary júrgizilip jatyr. Sondaı-aq jaqynda ashana ǵımaratyna da jylý jelisi tartylady», - deıdi SQO kásipkerlik jáne ındýstrıaldy-ınnovatsııalyq damý basqarmasynyń saýda jáne týrızmdi damytý bóliminiń bas mamany Aııa Qasıanova.
Investor shıpajaıdy qalpyna keltirýge búginge deıin 600 mln teńge jumsaǵan. Mamannyń aıtýynsha, ashylǵan kezde shıpajaıda fızıoterapııa, sýmen emdeý, fıtoterapııa, ınemen emdeý sııaqty birqatar em-dom kórsetilmek. Jospar boıynsha bıyl paıdalanýǵa beriledi. Óńirde sanatorlyq-kýrorttyq emge qajettilik bar. Byltyr oblystyq jumyspen qamtýdy úılestirý jáne áleýmettik baǵdarlamalar basqarmasy arqyly múgedektigi bar 952 adam tegin demalyp, densaýlyqtaryn shyńdap kelgen.
«Byltyr sanatorlyq-kýrorttyq em alýy úshin myńǵa jýyq adamǵa 200 mln teńge qarjy jumsaldy. Olar – dárigerdiń osyndaı em alýǵa kórsetilimi bar múmkindigi shekteýli jandar. Bul adamdar 2021 jyly qosylǵan áleýmettik qyzmetter portaly arqyly ońaltý qyzmetteri men quraldaryn búginde ózderi tańdap ala alady. Ol úshin qyzmet alýshynyń úıinde ınterneti jáne elektrondy-tsıfrlyq qoltańbasy bolýy qajet. Sol sııaqty shıpajaıdy da, baratyn kúnin ózi tańdap, ótinish qaldyrady. Tek qandaı da bir ózgeris bolyp, belgilengen kúnge bara almaı jatsa, úsh kún buryn eskertýi kerek. Turǵyndar Qazaqstannyń kez kelgen óńirindegi shıpajaıdy tańdap, bara alady», - deıdi SQO jumyspen qamtýdy úılestirý jáne áleýmettik baǵdarlamalar basqarmasy múgedektigi bar adamdardy ońaltý bóliminiń bas mamany Ivan Rjevskıı.
Mamannyń aıtýynsha, bıyl bıýdjetten osy maqsatqa 242 mln teńge bólingen. 969 adam sanatorlyq-kýrorttyq em ala alady.