SQO-da bes kúnde esirtkige qatysty 20 zańbuzýshylyq tirkeldi
SQO polıtsııa departamenti baspasóz qyzmetiniń málimetinshe, ótken aptada dárihanalar men medıtsınalyq mekemeler polıtsııa qyzmetkerleriniń nazarynda boldy. Tártip saqshylary quramynda esirtkisi bar zattardyń zańdy aınalymyna qatysty erejelerdiń saqtalýyn tekserdi. Mundaı zattar qylmystyq ortaǵa túsip ketpeý úshin olardy saqtaý jáne paıdalaný zańmen qatań baqylaýǵa alynǵan. Polıtseıler óz jumysynda prekýrsorlardy paıdalanatyn kásiporyndardy da tekserdi.
Tártip saqshylarynyń aıtýynsha, bul saladaǵy mamandar jumystaryna jaýapkershilikpen qaraǵan, degenmen 11 quqyq buzýshylyq anyqtaldy. Olardyń arasynda Petropavldaǵy dárihanalardyń birinde áser etý kúshi qatty dárilik zatty retseptisiz satý faktisi de bar. Farmatsevt QR Ákimshilik quqyq buzýshylyq týraly kodeksiniń 426-baby boıynsha jaýapqa tartyldy.
«Bul jumys 24-28 shilde aralyǵynda ótken «Dármek» jedel-profılaktıkalyq is-sharasy aıasynda júrgizildi. Sonymen birge, basqa da quqyq buzýshylyqtardy anyqtaý jáne jolyn kesý boıynsha jumystar da toqtatylmady. 5 kúnde 200 g astam α-PvP sıntetıkalyq esirtkisi, 42 kg keptirilmegen marıhýana tárkilendi. Jedel-profılaktıkalyq is-shara ótken ýaqytta esirtkige qatysty 20 quqyq buzýshylyq anyqtaldy, onyń 9-y - qylmystyq, onyń ishinde 3-eýi - esirtki ótkizý faktisi. Anyqtalǵan derekterge qatysty saraptamalar taǵaıyndaldy, olardyń nátıjeleri boıynsha protsestik sheshimder qabyldanady», - deıdi SQO PD esirtki qylmysyna qarsy is-qımyl basqarmasy bastyǵynyń mindetin atqarýshy Rýslan Úmbetov.