SQO-da Batyr Baıan atyndaǵy sport kesheni ashyldy
Nysannyń qurylysy byltyr tamyz aıynda bastaldy. Oǵan aýdan bıýdjetinen 107 mln teńge qarjy jumsalǵan. 1 100 sharshy metrdi alyp jatqan dene shynyqtyrý-saýyqtyrý kesheninde fıtnes, aýyr atletıka, trenajer, ámbebap oıyn zaldary bar.
«Elbasy Nursultan Nazarbaev sport salasyna óte úlken mán beredi. Jaqyndaǵy Joldaýynda sport salasyn ári qaraı damytýǵa, 100 jańa nysan salýǵa tapsyrma berdi. Búgin osy tapsyrma óńirde oblys ákiminiń basqarýymen oryndala bastady», deıdi sharaǵa qatysqan oblys ákiminiń birinshi orynbasary Aıdarbek Saparov.
Sporttyq keshenniń saltanatty ashylýynda Maǵjan Jumabaev aýdanynda buqaralyq sportty damytýǵa eleýli úles qosqan 113 azamat alǵys hatpen, qurmet gramotasymen marapattaldy.
«Úlken zalda voleıbol, fýtbol, basketboldan sektsııalar uıymdastyrylady.Sonymen qatar kelýshiler kúrespen shuǵyldanady. Kúnine túrli jastaǵy júzge jýyq adam keledi dep josparlap otyrmyz. Keshende kásibı sportshylarmen qatar áýesqoı sportshylar da kele alady. Bul keshen qosymsha bilim berý ortalyǵyna berildi», - deıdi M.Jumabaev aýdanyndaǵy qosymsha bilim berý ortalyǵynyń dırektory Aslan Biralın.
Avtor: Aqerke Dáýrenbekqyzy