SQO-da bastaýysh synyp oqýshylary tegin tamaqtanatyn bolady

PETROPAVL. QazAqparat – Soltústik Qazaqstan oblysynda orta mektepterdiń bastaýysh synyp oqýshylaryn tegin ystyq tamaqpen qamtý máselesi sheshilip jatyr. Tıisti qujat qoǵamnyń talqylaýyna usynyldy, dep habarlaıdy QazAqparat tilshisi.

«SQO memlekettik orta bilim berý uıymdarynda bastaýysh synyp oqýshylaryn tegin ystyq tamaqpen qamtamasyz etý týraly» qaýly jobasy Ashyq normatıvtik quqyqtyq aktiler portalynda jarııalandy. 19 maýsym kúni jaryqqa shyqqan qujat 3 shildege deıin talqylanbaq. Qaýlyǵa óńir basshysy Aıdarbek Saparov qol qoıǵan.

Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» Qazaqstan Respýblıkasy Zańyna, Qazaqstan Respýblıkasy Prezıdentiniń «Ádiletti Qazaqstan: bárimiz jáne árqaısymyz úshin. Qazir jáne árdaıym» saılaýaldy baǵdarlamasyn iske asyrý josparyna saı jáne Áleýmettik kómek kórsetiletin azamattarǵa áleýmettik kómektiń mólsherin, kózderin, túrlerin jáne ony berý qaǵıdalaryn bekitý týraly Qazaqstan Respýblıkasy Úkimetiniń qaýlysyna sáıkes sheshim qabyldanǵan.

SQO bilim basqarmasynyń málimetinshe, ótken oqý jylynda óńirdegi 465 bilim ordasynda 72 myńnan astam oqýshy bolsa, onyń 31 180-i – bastaýysh synypta oqydy. Bul mektepterdiń 98% - 439-ynda ystyq tamaq uıymdastyryldy. 2% - 11 mektepte býfet jumys istedi. Petropavlda ystyq tamaq 550 teńge tursa, aýdandarda túski as 500 teńge boldy.