SQO-da balyq sharýashylyǵymen aınalysatyn kásipkerdiń quqyǵy qorǵaldy
SQO Kásipkerler palatasy baspasóz qyzmetiniń málimetinshe, káspkerlik quqyǵyna nuqsan kelgendigi jóninde olarǵa «Vodoleı 2017» JShS-niń jetekshisi Azamat Samaratov aryzdanǵan. Kásipker M.Jumabaev aýdanyndaǵy Kamyshlovo kólin birneshe jyldan beri jalǵa alyp, balyq ósirýmen aınalysady. Alaıda 2017 jyly Kamyshlovo men Polovınnoe kólderiniń arasynda ruqsatsyz bógettiń qurylysy bastalǵan.
«Bul eki sý qoımasy da bir jyra-saıdyń boıynda ornalasqan. Arasy bógetpen jabylǵandyqtan Kamyshlovo kóli sýynyń tartylyp qalý qaýpi týdy. Sondaı-aq kóktemde qar erigende bóget sýdyń jolyn bógep, jaqyn mańdaǵy eldi mekenderdi sý basýy múmkin. Bul týraly aýdan ákimdigi men basqa ýákiletti organdarǵa maýsym aıynda belgili bolǵanymen, esh shara qoldanylmaǵan», - deıdi kásipkerlerdiń quqyǵyn qorǵaý jáne ákimshilik kedergilerdi tómendetý bóliminiń bastyǵy Aıdos Keńbeıilov.
Aýdan ákimdigi tamyz aıynda bógetti alyp tastaýǵa ýáde bergenimen qazan aıyna deıin jumystar bastalmaǵan. «Eger másele sheshilmese, qysta sýdyń azdyǵynan balyqtar qyrylady», - deıdi Azamat Samaratov.
Ruqsatsyz salynǵan bóget jaıy oblystyq kásipkerler palatasynyń kásipkerler quqyǵyn qorǵaý jáne sybaılas jemqorlyqqa qarsy is-qımyl keńesiniń otyrysynda qaraldy. Barlyq tarap sóz aldy.
«Ekologııalyq zańnamaǵa saı kez-kelgen nysan, sonyń ishinde gıdrotehnıkalyq qurylystar memlekettik-ekologııalyq saraptamadan ótýi tıis. Onyń qorshaǵan ortaǵa - atmosferaǵa, jerge, jerasty sýlaryna, janýarlar álemine áseri eskeriledi. Al bul bóget boıynsha tıisti jumystar júrgizilgen joq. Mundaı qurylystar anyqtalǵan jaǵdaıda jergilikti atqarýshy organ ony óz balansyna alyp, qyzmet kórsetýi kerek», - deıdi SQO tabıǵı resýrstar jáne tabıǵatty paıdalanýdy retteý basqarmasynyń bólim basshysy Erlan Táshimov.
Alaıda ákimdik esh baqylaýsyz salynǵan bógetti alǵysy joq. Bógetpen negizinen sharýalar ózderiniń alqaptaryna qysqa jolmen jetý úshin júredi eken. Sol sebepti qurylysty buzbaı, eki kóldi qubyr arqyly baılanystyrýǵa sheshim qabyldandy. Buǵan oqıǵa ornyna baryp, jaǵdaımen tanysqan SQO Tótenshe jaǵdaılar departamenti basshylyǵy da qarsy bolmady.
«Máseleni maýsym aıynan bastap aıtyp kelemin. Biraq tyńdar qulaq bolmady. Qazan aıynyń basynda oblystyń kásipkerler palatasyna aryzdandym. Eki kúnnen keıin másele keńeste qaraldy. Birer kúnnen keıin bógette tıisti jumystar bastalyp ketti. Qazir kólge sý qubarlar arqyly kelip jatyr. Másele tolyǵymen sheshildi», - deıdi kásipker Azamat Samaratov.