SQO-da balalar lagerleriniń ekeýi ǵana ruqsat qujatyn alǵan

PETROPAVL. QazAqparat – Soltústik Qazaqstan oblysynda 10 maýsymnan bastap balalardyń jazǵy saýyqtyrý lagerleri ashylyp jatyr. Ázirge 15 demalys ortalyǵynyń tek ekeýi ǵana sanıtarııalyq qyzmettiń ruqsatyn aldy, dep habarlaıdy QazAqparat tilshisi.

SQO Sanıtarııalyq-epıdemıologııalyq baqylaý departamenti basshysynyń orynbasary Tatıana Gorlovanyń aıtýynsha, óńirde jazǵy saýyqtyrý lagerleriniń ashylýy 10-17 maýsym aralyǵyna josparlanǵan. Bıyl 15 lagerdiń 12-si ǵana balalardy qabyldamaq. Munda 10-14 kúndik 5 aýysym jumys isteıdi.

«Jumysty bastaýǵa sanıtarııalyq-epıdemıologııalyq qorytyndy alý úshin 7 demalys lagerinen ótinim tústi. Olardyń ekeýi – Shal aqyn aýdanyndaǵy jáne Qyzyljar aýdanyndaǵy «Serebrıanyı bor» ruqsat qujatyn aldy. Qalǵan beseýi boıynsha jumys jasalyp jatyr. Úsh saýyqtyrý lageri bıyl balalardy qabyldamaıdy, Ǵ.Músirepov atyndaǵy aýdannyń «Solnyshko» lageri apattyq jaǵdaıda dep tanyldy», - deıdi Tatıana Gorlova.

Bıyl óńirdegi jazǵy saýyqtyrý lagerlerin kúrdeli jáne aǵymdaǵy jóndeýge 94 mln teńge bólingen.

«Lagerlerge qoıylatyn birqatar talap bar. Sonyń negizgisi sýǵa qatysty. Іshetin aýyz sý ǵana emes, sondaı-aq ystyq-sýyq sý jýynatyn orynǵa, medıtsınalyq, as ázirleıtin bólmege kelip turýy tıis.

Nysan jumysqa kirispes buryn ondaǵy úıler qalypqa keltirilip, barlyq júıe zararsyzdandyrylýy qajet. Lager aınalasy tazartylyp, jándikterge qarsy dezınsektsııa júrgizilýi tıis.

Aýa raıy 5 kún qatarynan +16 gradýstan joǵary bolǵanda ǵana jylytylmaıtyn nysandar balalardy qabyldaı alady», - deıdi departament basshysynyń orynbasary.