SQO-da balalar arasynda pnevmonııa órship tur

PETROPAVL. QazAqparat – Soltústik Qazaqstan oblysynda bıyl pnevmonııa balalar arasynda jıi tirkelip jatyr. Syrqattanǵandardyń 87%-y – 12 jasqa deıingi balalar, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamentiniń basshysy Áset Jumataevtyń aıtýynsha, óńirde 1 qazannan bastap pnevmonııa dıagnozy 474 adamǵa qoıylǵan. Bul – ótken jyldyń osy kezeńimen salystyrǵanda 27%-ǵa kóp, byltyr 373 jaǵdaı tirkelgen. Bir ereksheligi – bıyl ókpeniń qabynýy balalar arasynda beleń alǵan. 12 jasqa deıingi 412 bala aýyrǵan, bul – syrqattanǵandardyń 87%-y. Sonyń ishinde, 1 jasqa deıingi 102 sábı pnevmonııamen aýrýhanaǵa túsken. Al, júkti áıelderdiń úsheýi aýyrǵan.

«Qazirgi ýaqytta juqpaly aýrýlar boıynsha mektepter nemese synyptar karantınge jabylǵan joq. Barlyǵy qalypty jaǵdaıda jumys istep jatyr. Ótken aptada bir mekteptiń bir synyby ǵana oqshaýlandy», - deıdi Áset Jumataev.

Óńirdiń bas sanıtarııalyq dárigeri juqpaly aýrýlardan saqtaný úshin halyq kóp jınalatyn oryndarda – áýejaılar, temirjol vokzaly, avtovokzaldar, bazarlar, saýda-oıyn-saýyq ortalyqtary, saýda úıleri, teatrlar, kınoteatrlar, HQKO, bankterde, kóliktiń barlyq túrlerinde medıtsınalyq nemese mata maskalaryn taǵýdy usyndy.

«Qazirgi ýaqytta biz respıratorlyq ınfektsııalarmen syrqattanýshylyqtyń ósýin baıqap otyrmyz. Oblysta tumaý da, KVI de bar. Qazir merekelik keshter ýaqyty, alda demalys kúnderi keledi, sondyqtan aýyrǵan jaǵdaıda barlyǵyn úıde otyrýǵa, kópshilik jınalatyn jerlerge barmaýǵa, basqa adamdarǵa juqtyrmaýǵa shaqyramyn. Sondaı-aq, adam kóp jınalatyn jerlerde durys maska taǵýdy, áleýmettik qashyqtyqty saqtaýdy, qoldy sabynmen múmkindiginshe jıi jýýdy, antıseptıkter qoldanýdy usynamyn. Bólmelerdi únemi jeldetip, ylǵaldy tazalaý júrgizińiz», - deıdi Áset Jumataev.