SQO-da balabaqsha esepshisi 9,2 mln teńgeni jymqyrǵan

PETROPAVL. QazAqparat - Soltústik Qazaqstan oblysynyń Taıynsha aýdanyndaǵy «Aıgólek» balabaqshasy esepshisiniń 9,2 mln teńgeni urlaǵany belgili boldy, dep habarlaıdy QazAqparat tilshisi.

Oblystyq Іshki memlekettik aýdıt departamentiniń málimetinshe, «Aıgólek» balabaqshasynda eńbekaqynyń eseptelýi, jaldaý aqysynyń tólenýi, býhgalterlik eseptiń júrgizilýi jáne ata-analardan túsetin jarnanyń maqsatty jumsalýy tekserilgen.

Tekserý kezinde kóptegen bylyqtyń beti ashylyp otyr. Máselen, tárbıeshi kómekshisiniń eńbek ótiliniń durys eseptelmeýinen 344,4 myń teńge jáne eńbekaqy koeffıtsıentiniń durys qoıylmaýynan 73,7 myń teńge artyq tólengen.

Mamandardyń aıtýynsha, budan bólek balabaqshanyń esepshisi 9,2 mln teńgeni qaltasyna basypty. Ol 3 jyl boıy pedagogtardyń aqysyn jep kelgen, alaıda ol týraly eshkim ishki aýdıt departamentine shaǵymdanbaǵan. Tek bir adamnyń ǵana aryzdanýǵa batyly jetipti.

«Taıynsha aýdanyndaǵy «Aıgólek» balabaqshasynyń esepshisi úsh jyl boıy pedagogtardyń aqshasyn qaltasyna basyp kelgen. Zańǵa qaıshy áreketter jasaǵan. Eńbek, Salyq, bıýdjet zańnamalaryn buzdy. Salyqtardy tólemegen, mindetti áleýmettik medıtsınalyq saqtandyrý qoryna, tárbıeshilerdiń atyna zeınetaqy aýdarymdaryn jasamaǵan. Jeke tabys salyǵyn, kásipodaq jarnalaryn da óz qaltasyna salyp otyrǵan», - deıdi SQO boıynsha Іshki memlekettik aýdıt departamenti basshysynyń orynbasary Záýresh Qaparova.

Qarjy jymqyrý derekteri Aıyrtaý aýdanynyń bilim bóliminde de tirkeldi. Mamandardyń aıtýynsha, Saýmalkól mektep-ınternatynyń shatyryn jóndeýge bólingen aqshanyń talan-tarajǵa salynǵan. Sol iske qatysty materıal qazir quqyq qorǵaý organynda jatyr.

Resmı málimetke súıensek, óńirde aýdıtrlik tekseristiń qorytyndysy boıynsha 26 laýazymdy tulǵa tártiptik jaýapkershilikke tartyldy.