SQO-da áıelder kásipkerligin damytý ortalyǵy ashyldy
SQO kásipkerler palatasy baspasóz qyzmetiniń málimetinshe, mundaı ortalyqtar byltyr Túrkistan, Almaty jáne Mańǵystaý oblystarynda ashyldy, endi elimizdiń basqa óńirleri men iri qalalarda paıdalanýǵa berilip jatyr.
Ulttyq statıstıka derekterine súıensek, respýblıkada áıelder basqaratyn kásiporyndardyń úlesi - 42,3 %. Olardyń kópshiligi - shaǵyn jáne orta bıznes jáne osy saladaǵy jumys oryndarynyń 31,4 %-yn usynyp otyr.
SQO Kásipkerler palatasynyń dırektory Álibek Ashmetovtiń aıtýynsha, ortalyq isin jańa bastaǵan jáne jumys istep júrgen qyz-kelinshekterdiń startap-jobalaryndy yntalandyrý, jumys istep turǵan bıznestiń ekonomıkalyq belsendiligin arttyrýdy maqsat etken. Sondaı-aq oqytý baǵdarlamalary men túrli is-sharalarǵa qatysyp, birqatar qyzmetterdi ala alady.
«Áıelder kásipkerligi el ekonomıkasynyń damýyna úlken úles qosyp keledi. Áıelder bizdiń oqytý baǵdarlamalarymyzǵa da belsendi qatysady. Mysaly, «Bastaý Bıznes» jobasy jumys istegen bes jyl ishinde biz 8 myńǵa jýyq jumyssyz jáne ózin-ózi jumyspen qamtyǵan soltústikqazaqstandyqtardy oqyttyq, olardyń 42,6 %-y – qyz-kelinshekter. Bul búgingi tańda áıelderdiń erlermen teń jumys isteýge jáne tipti bızneste olarǵa laıyqty básekeles bolýǵa daıyn ekendigin kórsetedi», - deıdi Álibek Ashmetov.
Ortalyq qoldaý sharalarynyń túrlerine, oqytýǵa qajettilikti zerdeleıdi, sondaı-aq áıelder bıznesiniń damýyna kedergi keltiretin problemalardy anyqtaıdy.
«Bizdiń kópshiligimiz bızneste burynnan júrmiz. Buryn kásipkerlikti qoldaý, oqytý baǵdarlamalary, onyń ishinde áıelder kásipkerligin damytý úshin mundaı quraldar bolǵan joq. Óz qateligimizben, «qulap-turyp» úırendik. Búgingi tańda memlekettiń shaǵyn jáne orta bıznesti damytýǵa úlken kóńil bólýi – bul óte mańyzdy. Kásipkerler palatasy bar, ol isin jańa bastaǵan jáne jumys istep júrgen kásipkerlerge qarapaıym keńes berýden bastap, jobalardy súıemeldeýge deıin tegin qyzmetterdiń keń aýqymyn usynady. Men quramyna kiretin isker áıelder keńesi jumys isteıdi, endi mine, áıelder kásipkerligin damytý ortalyǵy ashyldy. Mundaı qoldaý shyn máninde adamdarǵa tabys tabýǵa, óz otbasyn asyraýǵa, damýǵa jáne óńir men el ekonomıkasyna óz úlesin qosýǵa múmkindik beredi», - deıdi jeke kásipker Tatıana Sımonova.