SQO-da aýylǵa kelgen 58 dárigerge 87 mln teńge kótermeaqy berildi
SQO ishki saıasat basqarmasynyń málimetinshe, óńirde dáriger jetispeýshiligi máselesi ózektiligin joıǵan joq. Oblystyń emdeý mekemelerine 230 maman kerek. Sonyń ishinde 27 terapevt, 21 pedıatr, 15 anestezıolog-reanımatolog, 15 akýsher-gınekolog jáne 10 hırýrg qajet.
Bıyl medıtsınalyq joǵary oqý oryndarynyń 169 túlegi Qyzyljar óńirine kelýi kerek, kelisim boıynsha, olardyń 86-sy jumys isteýge eldi mekenderge barady. Qazirdiń ózinde olardyń jartysyna jýyǵy qyzmetterine kirisip ketti.
Aıyrtaý aýdanyna bıyl memlekettik baǵdarlama boıynsha jumys kúshi artylǵan Túrkistan oblysynan 4 dáriger keldi. Solardyń biri Myrzataı Baıjuman Aıyrtaý aýdandyq aýrýhanasyna ýchaskelik terapevt bolyp jumysqa ornalasty. Zaıyby bıologııa pániniń muǵalimi, qazir dekrettik demalysta. Eki balasy bar otbasyǵa aýdandyq ákimdik 3 bólmeli páterdi turýǵa berdi. Qazir olar 1,5 mln teńge kótermeaqy alý úshin qujattaryn jınap jatyr.
Byltyr «Dıplommen aýylǵa» baǵdarlamasy aıasynda aýyldaǵy 26 dárigerge 4,377 mln teńge kótermeaqy jáne 11-ine baspana alýǵa 39 mln teńge bıýdjettik nesıe berildi. Al bıyl 10 dárigerge 2 mln jýyq teńge kótermeaqy bólinip, 7 dáriger 26,5 mln teńge bıýdjettik nesıe aldy.
Oblystyq máslıhattyń sheshimimen dárgerlerdiń jetispeýshiligi máselesin sheshý maqsatynda byltyrdan aýylǵa jumysqa kelgen ár mamanǵa 1,5 mln teńgeden berile bastady. 2018 jyly osy maqsatqa 40 mln teńge jumsalsa, bıyl 58 dáriger 87 mln 240 myń teńge aldy.
Petropavl qalasynda 80 páteri bar «Dárigerler úıi» bar. Bul jerde baspanasy joq jas mamandar tura alady. «7-20-25» turǵyn úı baǵdarlamasy aıasynda «Jas órken» yqsham aýdanynan medıtsınalyq qyzmetkerlerge 23 páter bólindi. Bıyldan bastap 1 mln teńgeniń turǵyn úı sertıfıkattary berile bastaıdy. Alǵashqy 100-i jas mamandarǵa berilmekshi.