SQO-da aýyldardy sýmen qamtýǵa bıyl 10,7 mlrd teńge bólindi
SQO ákimdigi jyldy qorytyndylap, bıylǵy mindetterdi aıqyndady. Ótken jyl pandemııaǵa baılanysty aýyr bolǵanymen ár salada jetistik bar. Óńir kóptegen kórsetkish boıynsha el kóleminde aldyńǵy oryndarda keledi. Bul jumystardyń barlyǵy halyqtyń turmysyn jaqsartyp, ál-aýqatyn arttyrý maqsatynda jasalyp jatyr.
Máselen, 2020 jyly sýmen qamtýǵa 6,5 mlrd teńge bólindi. Bul qarajat 76 eldimeken turǵyndaryna sapaly sýdy jetkizý úshin jumsaldy. 335 shaqyrym sý jelisi kúrdeli jóndeldi, 2900 úıge sý tartyldy. Qazir aýyl turǵyndarynyń 82 %-i sapaly aýyz sýmen qamtylǵan.
«Bıyl da bul jumystar jalǵasady. Sýmen qamtýǵa 10,7 mlrd teńge bólingen, bul byltyrǵydan 1,6 ese artyq. Ótken jyldary aýyldardaǵy taratý jelilerin qalypqa keltirdik. Eldi meken turǵyndaryn turaqty túrde sapaly sýmen qamtý úshin toptyq sý jelilerin jónge keltirý qajet. Sol sebepti osy jumystarǵa qarjyny biz ótken jylǵydan 5 ese artyq bóldik, 1,1-den 5,8 mlrd teńgege jetkizdik. Bul negizgi sýirkýish qurylystardy, 3 iri sorǵy stansasyn, taza sýǵa arnalǵan 2 rezervýardy jáne basqa da nysandardy jónge keltirýge múmkindik beredi», - deıdi SQO ákimi Qumar Aqsaqalov.
Aýyldardaǵy úılerge sý kirgizý jumystary da jalǵasady. Bıyl jospar boıynsha 3 myń baspanaǵa sý úıge tartylmaq.
«Turǵyndardyń úılerine sý kirgizýge ketetin shyǵynyn barynsha azaıtý qajet. Bul bizdiń qolymyzdan keledi. Ol úshin qudyqtardyń sanyn arttyrý kerek. Bul úı men jelige qosylý ara qashyqtyǵyn azaıtady. Sýmen qamtý boıynsha taratý jelileriniń jobasyn jasaǵanda osyny eskerýdi tapsyramyn», - dedi Qumar Aqsaqalov.