SQO-da aýylda esirtki zerthanasyn uıymdastyrýshy 16 jylǵa sottaldy
Óńirlik kommýnıkatsııalar qyzmetinde ótken baspasóz máslıhatynda SQO-daǵy esirtkige qatysty jaǵdaı aıtyldy. Polıtsııa departamenti esirtki qylmysyna qarsy is-qımyl basqarmasynyń bastyǵy Jandos Basybaevtyń aıtýynsha, byltyr 8 esirtki zerthanasy, sonyń ishinde 4 sıntetıkalyq esirtki óndirý jáne 4 fıto-esirtki zerthanasy anyqtaldy.
«2021 jyldyń aqpan aıynda oblys ortalyǵynda turatyn, «tuz» sıntetıkalyq psıhobelsendi preparattaryn satýmen aınalysqan erli-zaıyptyny anyqtadyq. Ári qaraı esirtki bıznesine qatysy bar adamdar tobyn anyqtadyq. Satýdy jolǵa qoıǵan qylmyskerler Jambyl aýdanynyń Mırolıýbovo eldi mekeninde esirtki zerthanasyn uıymdastyrý maqsatynda arnaıy úı satyp alyp, jabdyqtaǵan. Al esirtki jasaýǵa qajetti qopalardy TMD elderinen jetkizip otyrǵan», - deıdi Jandos Basybaev.
Jeke turǵyn úı zerthanaǵa laıyqtalǵan, arnaıy jabdyqtar: aralastyrǵyshtar, usaqtaǵyshtar, kolbalar, ólsheýish ydystar bolǵan. Sondaı-aq kúkirt, tuz jáne benzol jáne t.b. óte ýly qyshqyldarmen jumys isteý kezinde kıetin qorǵanys kostıýmderi men respıratorlar tabyldy.
«Júrgizilgen arnaıy operatsııanyń nátıjesinde 3 kg astam sıntetıkalyq esirtki tárkilendi – bul shamamen 50 myń doza. Budan basqa býyp-túıý materıaldary, onnan astam uıaly telefon, dárihana tarazysy, qashan, qansha satylǵandyǵy jazylǵan bloknot pen dápter tabyldy.
Qarasha aıynda mamandandyrylǵan oblystyq sotynyń úkimimen uıymdastyrýshy 16 jylǵa bas bostandyǵynan aıyryldy, qylmystyq toptyń qalǵan qatysýshylaryna 15, 11 jáne 12 jylǵa jaza kesildi», - deıdi basqarma bastyǵy.
Tártip saqshysynyń aıtýynsha, byltyr qylmystyq jaýapkershilikke 120 adam tartylsa, sonyń 42-si - 16 men 25 jas aralyǵyndaǵylar. 2020 jyldyń qańtarynan bastap esirtkini jarnamalaý jáne nasıhattaýǵa jaza kúsheıtildi. Eger buryn aıyppul salynsa, qazir qylmystyń bul túri úshin 3-6 jylǵa bas bostandyǵynan aıyrady.