SQO-da aýyl turǵyny ınternet-alaıaqtarǵa senip, 2 mln teńge nesıe alyp bergen

PETROPAVL. QazAqparat – Soltústik Qazaqstan oblysynda ınternet-alaıaqtar aýyl turǵynyna 2 mln teńge nesıe alǵyzǵan. Keıin ol aqshany óz shottaryna aýdartyp, er adamdy taqyrǵa otyrǵyzdy, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, Aıyrtaý aýdanynyń qarapaıym jumysshysy ınternet-alaıaqtardyń quryǵyna túsip qalǵan. Er adamdy qylmyskerler sońǵy kezde keń taralǵan ádispen aldaǵan.

Aýyl turǵynynyń aıtýynsha, oǵan telefonmen belgisiz áıel habarlasyp, tutqany banktiń qaýipsizdik qyzmetiniń qyzmetkerine beretinin aıtqan. Er adam oǵan bank shotyn belgisiz bireýlerdiń buǵaqtaǵanyn, sol sebepti jańa shot ashý qajettigin túsindirgen. Psıhologııalyq qysym jasap, «eger jańasyn ashpasańyz, aqshańyzdy budan bylaı kórmeısiz, shotyńyzdan únemi joǵalyp otyrady» dep qorqytqan.

Qylmyskerdiń arbaýyna túsken aýyldyq 2 mln teńge nesıe rásimdep, ony alaıaqtar bergen jańa kartochkaǵa aýdarǵan. Búkil qupııa sózdi aıtyp bergen. Olarmen baılanys úzilgen ýaqytta ǵana óziniń aldanǵanyn túsinip, birden polıtsııaǵa aryzdanǵan.

«Qazir bul derekke qatysty jedel-tergeý sharalary qolǵa alyndy. Er adam qylmystyń bul túri týraly buryn estigen, biraq mán bermegen. Jalpy aýdanda ınternet-alaıaqtyqtyń aldyn alý úshin túrli is-sharalar ótkizilip jatyr. Eskertý maqsatynda aýdandyq gazette, áleýmettik jelilerde birneshe maqala shyqty. Kisi kóp júretin jerlerde beınerolıkter júrip jatyr. Belgisiz bireýler qońyraý shalǵan jaǵdaıda baılanysty úzip, shotty tekserý úshin bankke barýǵa keńes beremiz. Jeke, qupııa málimetterdi eshkimge bermeńizder», - deıdi Aıyrtaý aýdandyq polıtsııa bóliminiń bastyǵy Marat Serkeshev.