SQO-da aýyl mektebiniń oqýshysy Abaıdyń 110 óleńin jatqa biledi

PETROPAVL. QazAqparat – Soltústik Qazaqstan oblysynda mektep oqýshysy Quralaı Sovet Abaıdyń 110 óleńin jatqa biledi, dep habarlaıdy QazAqparat tilshisi.

Quralaı Sovet Esil aýdany Aqtas aýylynyń týmasy. Aýyldaǵy mektep 9-synypqa deıin ǵana bolǵandyqtan qazir aýdan ortalyǵy ıAvlenkadaǵy №3 orta mektepte 11-synypta oqyp jatyr. Abaı óleńderin jattaýǵa degen qyzyǵýshylyǵy 5-synypta bastalǵan eken.

«Abaıdyń óleńderinen eń birinshi jattaǵanym – «Qys». Abaı tabıǵatty aıryqsha jyrlaıdy ǵoı, onyń sol tabıǵatty qanshalyqty jaqsy kórgenin óleńderinen baıqaısyń. «Kúz», «Qys», «Jaz», «Jelsiz túnde jaryq aı» degen óleńderin oqyǵanda tabıǵattyń qubylysy kóz aldyńa elesteıdi. Al óleńderin jattaı bastaýyma ápkem Altynaı sebepshi boldy. Onyń sabaqqa daıyndalǵanyn kórip, óleńderine qyzyǵýshylyǵym týdy», - deıdi Quralaı.

Quralaı óleń oqýdan túrli baıqaýlardyń jeńimpazy. Qazir ol uly aqynnyń 110 óleńin jatqa biledi.

«Óleń jattarda eń aldymen, maǵynasy men mazmunyna mán beresiń ǵoı. Abaıdyń barlyq óleńderi tereń maǵynaly. Sol sebepti shetinen alyp jattaı beremin. Óleń jattaýdyń adamǵa bereri kóp, sózdik qor molaıady. Túrli baıqaýlarǵa qatysýǵa múmkindik aldym, nátıjesinde dostarym kóbeıdi», - deıdi boıjetken.

Quralaıdyń ákesi – mehanızator bolyp eńbek etse, anasy úı sharýasynda. Ápkesi Altynaı M.Qozybaev atyndaǵy SQÝ-dyń 4-kýrsynda oqıdy. Bolashaq bıolog. Іnisi Esbolat 4-synyp oqýshysy.

«Altynaıym asyq oınaıdy. Respýblıkalyq týrnırlerge qatysyp, elimizdiń jarty qalasynda boldy. Esbolat ápkesi Quralaıǵa eliktep, Abaıdyń óleńderin jattap júr. Bir jylda aqynnyń 25 óleńin jattap aldy. Al Quralaıym bárin bilip, úırengisi kelip turady. Ol toqıdy, is tigedi, tátti-dámdini pisirgendi de unatady. Meniń kómekshim», - deıdi Quralaıdyń anasy Záýre Bekqojına.

Quralaı Sovet – oqý úzdigi. Qazir UBT-ǵa ázirlenip júr. Bolashaǵyn medıtsınamen baılanystyrmaqshy.