SQO-da aýyl mektebi 250 mln teńgege zamanǵa saı jaraqtandyryldy
Petropavldan 340 km shalǵaı jatqan Ýálıhanov aýdany Kishkenekól aýylyndaǵy №2 orta mektep «Qazaqstan halqyna» qory, «Bilim berýdi turaqty damytý» qory men Nazarbaev zııatkerlik mektepteriniń birlesken jobasy aıasynda tanymastaı ózgerdi.
Bul bilim ordasy «Aýyldyq jerlerde tirek mektepteriniń áleýetin damytý» jobasy aıasynda el boıynsha jańartylatyn 17 aýyldyq mekteptiń qataryna endi. Jalpy bir mektepti jańǵyrtýǵa 250 mln teńgege jýyq qarajat bólingen.
«Elimizdegi bilim berý salasynda eki úlken másele bar. Alǵashqysy – aımaqtyq erekshelik bolsa, ekinshisi – qala men aýyl mektepteriniń arasyndaǵy alshaqtyq. Buǵan, árıne, sebep kóp. Ony ótken tarıhpen, qazirgi kezde ýrbanızatsııamen baılanystyra alamyz. Bilim berýdi turaqty damytý qory mektepti tek materıaldyq turǵyda emes, ádistemelik turǵyda da qoldaıtynyn aıtty. Bul jerde rýhanı qoldaý, qyzmetkerler men oqýshylardy jigerlendirý de baryn aıta ketken jón. Qordaǵy áriptestermen birge osy Kishkenekóldegi mektepti tańdadyq. Óıtkeni bul – oblystaǵy eń shalǵaı jatqan aýyl. Osylaısha, aýyldyń damýyna kúsh berip, halyqtyń qaıta alǵa basýyna jaǵdaı jasaǵymyz keldi. Jańa jabdyqtar, durys tańdalǵan ádistemeniń nátıjesin kórip otyrmyz. Endigi kezekte bilikti muǵalimderdiń kómegimen oqýshylarǵa keleshekte óz ornyn tabýǵa jol ashamyz dep senemiz», – deıdi SQO bilim basqarmasynyń basshysy Názir Jáshibekov.
Nátıjesinde 500-den astam oqýshysy bar №2 Kishkenekól orta mektebiniń materıaldyq-tehnıkalyq bazasy zamanǵa saı jaraqtandyryldy. Ǵasyrlyq tarıhy bar bilim ordasyndaǵy kóne quraldardyń ornyn zamanaýı jabdyqtar basty. Qazir mektepte jalpy 32 oqý kabıneti men qosymsha bilim berý sheberhanalary - STEM-zerthana, ART-stýdııa, telestýdııa, oqýshylarǵa arnalǵan kovorkıng aımaǵy bar kitaphana bar.
«Bizdiń mektebimizde jańa ózgerister bolyp jatyr. Tehnologııa kabıneti kóptegen jańa qural-saımanmen jabdyqtaldy. Oqýshylar búgin sabaq barysynda aǵash óńdeý taqyrybyn ótip jatyr. Balalar tapsyrmany qyzyǵa oryndaıdy. Bul jerde kerek qural-saımannyń bári bar», - deıdi mektep muǵalimi Qýanysh Nartaıuly.
Jobanyń aralyq qorytyndysymen tanysýǵa aýdan turǵyndary, jergilikti atqarýshy bılik ókilderi, BAQ ókilderi men joba seriktesteri, demeýshileri qatysty. Іs-sharada oqytý baǵdarlamasynyń nátıjesi aıtylyp, mekteptiń jańarǵan materıaldyq bazasy kórsetildi.
Foto: Bilim berýdi turaqty damytý qory