SQO-da aýylǵa baratyn dárigerlerge 5 mln teńge kótermeaqy beriledi

<p>Soltústik Qazaqstan oblysynda dárigerlerdiń jetispeýshiligin joıý maqsatynda bir rettik kótermeaqy mólsheri taǵy da ósirildi. Endi aýylǵa baratyn belgili bir salanyń dárigerine - 5 mln, qalada qalatyn bolsa 3,5 mln teńge tólenbek, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

SQO ákimdiginiń otyrysynda densaýlyq saqtaý basqarmasynyń basshysy Qumar Kúsemisov kadr jetispeýshiligi máselesine toqtaldy.

Búginde óńirde 144 dárigerdiń orny bos tur, Petropavlǵa 71, aýyldarǵa 73 maman kerek.

«16 - jalpy praktıka dárigeri, 13 – akýsher-gınekolog, 9 – hırýrg, 6 – oftalmolog, 7 – otolarıngolog, 10 – pedıatr, 7 – terapevt, 11 – kardıolog qajet.
Maman jetispeýiniń negizgi sebepterine keler bolsaq: mamandar basqa jaqqa qonys aýdarǵan, zeınetke shyqty, jeke sektorǵa aýysty», - deıdi basqarma basshysy.

Oblysqa kadr tartýdyń birden-bir joly – kótermeaqy tóleý. Byltyr óńirge 280 dáriger keldi, onyń – 185-i qalada qalsa, 95-i aýylǵa baryp jumysqa ornalasqan.

Kelgenderdiń 156-sy jas maman. Solardyń 167-sine 314 mln teńge kótermeaqy berilgen.

«Qazan aıynda ótken oblystyq máslıhattyń sessııasynda dárigerler úshin beriletin kótermeaqy mólsheri ósirildi. Endi jalpy praktıka dárigeri Petropavlǵa kelse 1 mln, aýylǵa barsa 1,5 mln teńge alady, tar beıindi mamandar qalada qalsa 3,5, aýylǵa barsa 5 mln teńge kótermeaqy almaq. Bıyl kóterme járdemaqy tóleýge bıýdjetten 250 mln teńge bólindi», - deıdi Qumar Kúsemisov.

Qazirgi ýaqytta SQO-da 1 471 dáriger jáne 5 032 orta medıtsına qyzmetkeri bar.