SQO-da aýdandyq statsıonarlar jabylady

PETROPAVL. QazAqparat – Soltústik Qazaqstan oblysynda koronavırýs boıynsha epıdemıologııalyq jaǵdaı birshama turaqtaldy. Qazirgi ýaqytta ınfektsııalyq statsıonarlarda 62 adam em alym jatyr, dep habarlaıdy QazAqparat tilshisi.

Óńirlik kommýnıkatsııalar qyzmetinde ótken brıfıngide SQO densaýlyq saqtaý basqarmasynyń basshysy Nurlan Aımanov oblystaǵy koronavırýsqa qatysty jaǵdaıǵa toqtaldy. Óńirdiń bas dárigeriniń aıtýynsha, epıdemıologııalyq jaǵdaı jaqsardy.

«Infektsııalyq statsıonarlarda 62 adam em alyp jatyr. Jansaqtaý bólimshesindegi 7 naýqastyń jaǵdaıy aýyr. Emdeý mekemeleri 9 %-ǵa júktelgen. Qazirgi ýaqytta KVI juqtyrǵandarǵa arnalǵan 704 oryn bar. 1700 orynǵa deıin jetken kezder boldy. Qazir kezeń-kezeńmen azaıtyp jatyrmyz.

Keı oblystarda búgin sońǵy syrqattar jazylyp shyqty. Bizdiń óńirde oǵan áli erte. Onyń birneshe sebepteri bar, sonyń biri – óńir turǵyndarynyń 27 %-y – jasy 65-ten asqandar. Olar qater tobyna jatady. Qazir óńirdegi bes emdeý mekemesinde – oblystyq kópbeıindi aýrýhanada, qalalyq jáne oblystyq balalar aýrýhanasynda, ınfektsııalyq aýrýhanada jáne oblystyq ftızıopýlmonologııa ortalyǵynda statsıonarlar jumys istep tur. Oblystyq balalar aýrýhanasynda bir ǵana bala em alyp jatyr. Qazir táýligine 5-10 adamnan túsedi, bul jaqsy kórsetkish», - deıdi Nurlan Aımanov.

Mamannyń aıtýynsha, jaǵdaı áli de jaqsarýy úshin ujymdyq ımmýnıtet qalyptastyrý qajet. Ol úshin óńirdiń 370 myń turǵyny ekpe saldyrýy tıis. Biraq ázirge 304,2 myń adam vaktsınanyń birinshi komponentin ǵana aldy. Revaktsınatsııadan 196 myń turǵyn ótýi tıis bolsa, sonyń 100,8 myńy ǵana ekpe saldyrǵan.

«Vaktsınatsııanyń nátıjesin kórdik. Ekpe alǵan adamda aýrý jeńil ótedi, muny tájirıbe kórsetip keledi. Sondyqtan halyqty vaktsına saldyrýǵa shaqyramyz», - deıdi Nurlan Aımanov.

SQO-da pandemııa bastalǵaly 484 adam qaıtys boldy.