SQO-da aýdandyq ákimdikter 148 mln teńgege sapa sertıfıkatynsyz oıyn alańdaryn almaq bolǵan

<p>PETROPAVL. KAZINFORM &ndash; Soltústik Qazaqstan oblysynyń prokýrorlary bıýdjet qarajatynyń jumsalýyna taldaý júrgizý aıasynda memlekettik satyp alý týraly zańnamany óreskel buzý derekterin anyqtady.&nbsp;</p>

SQO prokýratýrasynyń málimetinshe, tekserý barysynda 1,9 mlrd teńgeniń negizsiz jumsalýyna jol berilmedi. 

Oblys ákimdiginiń qurylys, sáýlet jáne qala qurylysy basqarmasynyń laýazymdy tulǵalary «Memlekettik satyp alý jáne sáýlet-qala qurylysy qyzmeti týraly» QR Zańdarynyń talaptaryn buzǵan. Olar balabaqsha qurylysyn júrgizý úshin memlekettik satyp alýlar arqyly qujaty joq jer ýchaskesin 1,7 mlrd teńgege almaq bolǵan. 

Sondaı-aq Qyzyljar, Ýálıhanov aýdandaryndaǵy ákimdikterdiń laýazymdy tulǵalary memlekettik satyp alý týraly zańnama talaptaryna qaıshy, ashyq konkýrstyń ornyna baǵa usynystaryn suraý arqyly 107 mln teńgeden astam somaǵa memlekettik satyp alýdy júzege asyrýǵa árekettengen. 

Al, Aıyrtaý, Ǵ.Músirepov, Qyzyljar aýdandarynyń ákimdikteri taýardyń sapa sertıfıkattarynyń bolý qajettigi týraly talaptardy belgilemeı, 148 mln teńgege sporttyq oıyn alańdaryna memlekettik satyp alýdy júzege asyrǵan. 

Qadaǵalaý organynyń aktileri boıynsha kináli laýazymdy tulǵalardy tártiptik jaýapkershilikke tartý máseleleri qaralyp jatyr.

Jalpy jyl basynan beri prokýrorlar zańsyz júrgizilmek bolǵan memlekettik satyp alýlardyń 8-ine jol bermedi.