SQO-da aýdan ortalyqtary keshendi túrde damytylady
SQO ákimi Qumar Aqsaqalov áleýmettik jelilerdegi jeke paraqshalarynda aýdan ortalyqtaryn damytýǵa qatysty josparlarymen bólisti. Óńir basshysynyń aıtýynsha, búginde bul eldi mekenderdi keshendi damytý qolǵa alynǵan.
«Mysal retinde Saýmalkól eldi mekenin aıtýǵa bolady. Kóp jyldan keıin alǵash ret aýdan ortalyǵynda birden 18 kóshe jónge keltirildi. Aýrýhana men mektep kúrdeli jóndeýden ótti.
Shırek ǵasyr jumys istemeı turǵan basseın qaıta qalpyna keltirilip, iske qosyldy. Jaqynda 800 balaǵa shaqtalǵan óner mektebi paıdalanýǵa beriledi. Saýmalkólde jańa dene shynyqtyrý-saýyqtyrý kesheni ashylady. Jyl saıyn munda eki kóp qabatty úıdi qalpyna keltirip, iske qosyp otyramyz», - dedi Qumar Aqsaqalov.
Byltyr aýdan ortalyǵynda jylý jelisin tartý jumystary bastaldy. Bıyl jalǵasyn taýyp, ortalyqtandyrylǵan qazandyq salynady. Bul Saýmalkóldegi 20 kópqabatty úıdi jylýmen turaqty qamtýǵa jáne taǵy 5 kóp qabatty úıdi, áleýmettik nysandardy qosýǵa múmkindik bermek.
«Burynǵy aýdan ortalyqtary da keshendi damytýdan ótedi. Aryqbalyqta bıoqazandyq ornatyp, nátıjesinde 17 ǵımaratty jylý berý júıesine qosý múmkin bolmaq. Olar: eki qabatty turǵyn úıler, mektep, mádenıet úıi, ambýlatorııa men memlekettik mekemeler. Aryqbalyqtaǵy kósheler orta jóndeýden ótedi, jaryq ornatamyz. Bul eldi mekenge jańa ınvestorlar keldi, olar mal sharýashylyǵynda tyń jobalardy júzege asyrmaqshy. 5 mlrd teńge quıady. 10 myń basqa arnalǵan bordaqylaý alańy ashylady. Bul jumystardyń barlyǵy burynǵy aýdan ortalyǵynyń damýyna tyń serpin beredi», - dep jazdy óńir basshysy.
Jalpy bıyl oblystyń aýdan ortalyqtarynda 12 bıoqazandyq ornatylady degen jospar bar.
Al tórt aýdanda jylý jelisin tartyp, birqatar áleýmettik nysandardy jáne 1200 turǵyny bar 38 kóppáterli úıdi jylý berý júıesine qosý úshin 592 mln teńge jumsalmaqshy.