SQO-da aýdan ákiminiń orynbasary para alǵany úshin sottaldy

<p>ASTANA. KAZINFORM — Bıylǵy jyldyń 30 qazanynda Petropavl qalalyq soty Soltústik Qazaqstan oblysy Taıynsha aýdany ákiminiń orynbasary, aýdandyq TKSh bóliminiń basshysy jáne JShS dırektoryna qatysty úkim shyǵardy.</p>

Aýdan ákiminiń orynbasary jáne aýdandyq TKSh bóliminiń basshysy aýdandyq mańyzy bar joldardy aǵymdaǵy jóndeý boıynsha oryndalǵan jumystar aktilerine kedergisiz qol qoıǵany úshin 10 mln teńge kóleminde para alǵany úshin, al JShS dırektory para bergeni úshin kináli dep tanyldy.

— Sot úkimimen aýdan ákiminiń orynbasary 7 jyl 6 aıǵa bas bostandyǵynan aıyryldy, aýdandyq TKSh bóliminiń basshysy — 7 jylǵa, JShS dırektory — 3 jyl 6 aıǵa sottaldy. Budan basqa, sottalǵandarǵa memlekettik qyzmette jáne kvazımemlekettik sektor sýbektilerinde qyzmet atqarýǵa ómir boıy tyıym salyndy. Sot aktisi zańdy kúshine engen joq, — delingen Antıkor taratqan habarlamada.

Aıta keteıik, Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodeksiniń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi. 

Buǵan deıin habarlaǵanymyzdaı, laýazymyn asyra paıdalanǵan QTJ sheneýnigi 4 jylǵa sottaldy.