SQO-da aýdan ákiminiń orynbasary 3 jylǵa sottaldy

PETROPAVL. QazAqparat – Soltústik Qazaqstan oblysynda Maǵjan Jumabaev aýdany ákiminiń orynbasary aldap alǵan 200 myń teńge úshin 3 jylǵa bas bostandyǵynan aıyryldy, dep habarlaıdy QazAqparat tilshisi.

SQO sotynyń málimetinshe, 2 naýryz kúni oblystyq sottyń appelıatsııalyq alqasy prokýrordyń appelıatsııalyq ótinishimen K.-ǵa qatysty alaıaqtyq jasaýǵa oqtalý qylmystyq isin qarady.

Sottalǵan Maǵjan Jumabaev aýdany ákiminiń orynbasary laýazymyn atqara otyryp, M-dan 200 myń teńgeni alaıaqtyq jolmen alǵan. Sheneýnik bıýdjet qarajatyn oǵan merziminen buryn aýdarýǵa járdemdesemin degen K. qylmys ornynda ustaldy.

Petropavl qalalyq soty oǵan urlanǵan múliktiń 15 eselengen mólsherinde, ıaǵnı 3 mln teńge aıyppul salýǵa úkim shyǵardy.

Bul úkimmen prokýror kelispeı, apellıatsııalyq ótinish berdi. Qadaǵalaýshy organ úkimniń tym «jumsaqtyǵyn» aıtyp, K-ǵa taǵaıyndalǵan jazamen kelispedi.

Qylmystyń bul túrine aıyppul nemese bas bostandyǵynan aıyrý túrindegi jaza qarastyrylǵan.

Sot K-niń qylmystyq jaýapkershiligin jeńildetetin jaǵdaı dep onyń shyn júrekten ókinýin, jas balalarynyń, sonyń ishinde aýyr dertti balasynyń bolýyn esepke aldy. Al K-nyń ózi qabyldaǵan antty buzýy - aýyrlatatyn mán-jaı dep tanyldy.

Appelıatsııalyq alqa K-ǵa taǵaıyndalǵan aıyppul túrindegi jazanyń sottalǵan adamnyń jeke basyna jáne ol jasaǵan qylmystyq quqyq buzýshylyqtyń aýyrlyǵyna sáıkes kelmeıtinin moıyndady.

Sot alqasynyń qaýlysymen K.-ǵa qatysty úkim ózgertilip, ony 3 jyl merzimge bas bostandyǵynan aıyrý jazasy kesildi.

Apellıatsııalyq qaýly zańdy kúshine endi.