SQO-da ataýly áleýmettik kómekti zańsyz alǵan 20 otbasynyń isi sotqa jiberildi

PETROPAVL. QazAqparat – Soltústik Qazaqstan oblysynda bıyl ataýly áleýmettik kómekti alatyndardyń sany 13 ese artyp, 26988 adamǵa jetti, dep habarlaıdy QazAqparat tilshisi.

Bul jaıynda aımaqtyq kommýnıkatsııalar qyzmetinde SQO oblysy ákiminiń orynbasary Asqar Saqypkereev aıtty. Onyń habarlaýynsha, óńirde kóp balaly otbasylarǵa ataýly áleýmettik kómek jasaý úshin bıýdjetten 2,5 mlrd teńge jumsaldy. Bul qarajat otbasylarǵa aıtarlyqtaı kómek boldy. Alaıda, oblysta tabysy men kásibin jasyryp, ataýly áleýmettik kómekti zańsyz alyp kelgender anyqtalyp otyr. Tekseris barysynda 1152 otbasy boıynsha suraqtar týyndap, qaıta maǵlumattar jınaldy.

Nátıjesinde 705 otbasyǵa tabysynyń belgili mejeden asyp ketýine baılanysty tólem jasaý toqtatyldy. Olardyń 167-si bıýdjetke 14,7 mln teńgeni qaıtardy. Jalpy somasy 4592,4 myń teńge bolatyn 20 is sottyń qaraýyna jiberildi. 500-deı otbasyǵa taǵaıyndalǵa ataýly áleýmettik kómek qaıta esepteldi.

Qazir óńirde 27 myńǵa jýyq adam ataýly áleýmettik kómek alady. Mamandardyń esebinshe, 5 múshesi bar otbasyǵa beriletin járdemaqynyń mólsheri 5,4 ese artyp, shamamen 13 myń teńgeden 75 myń teńgege deıin jetti.