SQO-da áskerı esepke alynatyn jastardyń 30% densaýlyǵy nashar

PETROPAVL. QazAqparat - Qazaqstanda jastardy áskerı esepke alý naýqany júrip jatyr. Soltústik Qazaqstan oblysynda bıyl 3 myń bozbala áskerge shaqyrý ýchaskelerine tirkelmek, dep habarlaıdy QazAqparat tilshisi.

SQO boıynsha Qorǵanys isteri jónindegi departament bastyǵynyń orynbasary Dáýlet Tolybaıdyń aıtýynsha, áskerge shaqyrý ýchaskelerine tirkeý jumystary 8 qańtarda bastalyp, naýryzdyń sońyna deıin jalǵaspaq. Esepke alynatyn jastardyń 1,5 myńy Petropavldan bolsa, dál osynshasy - aýdandardan.

Tirkeýdi jergilikti áskerı basqarý organdary men jergilikti ákimdikter birlesip, azamattardy áskerı esepke qoıý úshin, olardyń sanyn, bilim jáne dene daıyndyǵy deńgeıin, áskerı qyzmetke jaramdylyǵyn anyqtaý maqsatynda uıymdastyrýda.

Tájirıbe kórsetip otyrǵandaı, tirkelýge kelgen 17 jastaǵy bozbalalardyń shamamen 30% densaýlyǵy nashar. Mamandardyń aıtýynsha, jastardyń kóbi búginde kóz aýrýlarymen aýyrady. Sondaı-aq maıtabandyq, júrek-qan tamyrlary aýrýlary da kezdesedi. Oǵan qosa, aýdandarda dárigerlerdiń jetispeýshiligi baıqalady.

«Áskerı esepke tirkeý jumystaryn júrgizý maqsatynda jergilikti atqarýshy organdardyń sheshimimen aýdandarda arnaıy komıssııalar qurylǵan. Esepke qoıý jumystaryn bastamaı turyp mektepterde túsindirý sharalaryn ótkizdik. Sondaı-aq oqýshylardy áskerı oqý oryndaryna túsýge qajetti qujattar tizimimen tanystyrdyq»,- deıdi Dáýlet Tolybaı.

Áskerı tirkeý kezinde QR Qorǵanys mınıstrliginiń joǵary oqý oryndary men Kadet korpýsyna, basqa da áskerı bilim berý mekemelerine túsýge jastar arasynda úgit-nasıhat jumystary júrgiziledi.