SQO-da Ashyq nysandaryna demalys kúnderi tek «jasyl» mártebesi bar turǵyndar ǵana kire alady

PETROPAVL. QazAqparat – Soltústik Qazaqstan oblysynda shekteý sharalary kúsheıtildi. 28 tamyzdan bastap demalys kúnderi Ashyq jobasyna qatysatyn nysandarǵa tek «jasyl» mártebesi bar turǵyndar ǵana kire alady, dep habarlaıdy QazAqparat tilshisi.

SQO bas sanıtar dárigeriniń jańa qaýlysyna sáıkes, Ashyq jobasyna qatysatyn barlyq kásipkerlik nysany 28 tamyzdan bastap túngi saǵat 00.00-ge deıin, al joba kóshbasshylary túngi saǵat 02.00-ge deıin jumys isteı alady. Alaıda demalys kúnderi bul nysandarǵa tek «jasyl» mártebesi bar turǵyndar ǵana kire alady.

«Bul nysandarǵa demalys kúnderi vaktsına alǵandar nemese 7 kúnge jaramdy PTR testi bar adamdar, densaýlyǵyna baılanysty vaktsınaǵa qarsy turaqty medıtsınalyq kórsetilimi bar nemese koronavırýspen aýyrǵanyna 3 aı ótpegender kire alady. Al 30 tamyzdan bastap, jaı kúnderi «kók» jáne «jasyl» tústi mártebesi barlarǵa kirýge ruqsat. Demalys kúnderi qaıtadan «jasyl» tústiler ǵana kiredi. Bul jaǵdaıdyń qansha ýaqytqa deıin sozylatyny ázirge belgisiz. Qyzmetkerler de dál osy talappen jumysqa kiredi», - deıdi SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasov.

Shekteý sharalaryn buzǵandardy anyqtaý boıynsha óńirde jumystar jalǵasyp jatyr. Tamyz aıynyń basynan monıtorıngtik toptar 1775 nysandy qamtı otyra 224 reıd júrgizgen. Nátıjesinde 49 tulǵa anyqtalyp, olarǵa 2,9 mln teńge aıyppul salyndy.

Úı karantıni rejımin buzǵan adamdardy jaýapkershilikke tartý jumystary da jalǵasady. Ashyq jobasyn engizgen nysandarǵa kirýge tyrysqan 17 adam jaýapkershilikke tartyldy.