SQO-da «Ashyq» qosymshasy karantın talabyn buzǵandardy kórsetip jatyr

PETROPAVL. QazAqparat – Soltústik Qazaqstan oblysynda koronavırýspen aýyratyn jáne aýyrǵan adammen baılanysta bolǵan 4 adam qoǵamdyq oryndarǵa baryp, «Ashyq» qosymshasynyń kómegimen anyqtaldy, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, COVID-19-ǵa PTR testiniń oń nátıjesi bar áıel Petropavldaǵy saýda ortalyqtarynyń birine barǵan. Onyń «qyzyl» mártebesin «Ashyq» qosymshasy kórsetken. Jobanyń júıesi aýyrǵan adammen baılanysty bolǵan taǵy bir adamdy anyqtaýǵa kómektesti.

Karantın talabyn buzǵandar jaıynda Petropavl qalalyq sanıtarııalyq-epıdemıologııalyq baqylaý basqarmasyna habarlandy.

«Basqalaryna qaýipti vırýsty juqtyrmaý úshin olar 14 kún boıy úı karantıninde otyrýlary qajet edi. Petropavl turǵyndary alǵash ret karantın talabyn buzyp otyr. Sol sebepti bul joly túsinikteme jazyp, eskertý aldy. Olarmen profılaktıkalyq áńgime júrgizildi. Eger de quqyq buzýshylyq qaıtalanatyn bolsa, onda ákimshilik jaýapkershilikke tartylady.

5AEK mólsherinde aıyppul tóleıdi», - deıdi Petropavl qalalyq sanıtarııalyq-epıdemıologııalyq baqylaý basqarmasy bóliminiń bas mamany Kúltaı Muhammetova.

Al aýyrǵan adammen baılanysta bolǵan er adam karantın talabyn buzyp, Petropavldaǵy meıramhanalardyń birine barǵan.

Qazir oblys ortalyǵynda 56 nysan «Ashyq» jobasyna qosylyp, QR-kod aldy. Olardyń ishinde kınoteatrlar, saýda úıleri, mádenıet nysandary, saýna, qoǵamdyq tamaqtaný, kóńil kóterý jáne oqý oryndary bar.