SQO-da artemia salina shaıanynyń 24 tonna jumyrtqasyn zańsyz óndirgender ustaldy

<p>PETROPAVL. KAZINFORM &ndash; Soltústik Qazaqstan oblysynda polıtseıler men áskerı qyzmetshilerdiń birlesken operatsııasy barysynda artemia salina shaıanynyń tsıstalaryn zańsyz óndirgender ustaldy. Endi olar 3 jylǵa deıin bas bostandyǵynan aıyrylýy múmkin.&nbsp;</p>

SQO Polıtsııa departamenti baspasóz qyzmetiniń málimetinshe, is-sharaǵa uıymdasqan qylmysqa qarsy kúres basqarmasynyń qyzmetkerleri, 6637 áskerı bólimi «B» tobynyń áskerı qyzmetshileri qatysty. Nátıjesinde artemia salina shaıany tsıstalaryn rekordtyq mólsherde zańsyz alýdyń joly kesildi.

Jedel ýákildermen júrgizilgen aýqymdy jumystyń nátıjesinde 13 tamyzda Qyzyljar aýdanynyń aýmaǵynda «KamAZ» júk kóliginen 260 qap shaıan tsıstalary tárkilendi. Taǵy 242 qap Beskól eldi mekenindegi qoımadan alyndy.

Kúdiktiler – Taıynsha aýdanynyń 35 jastaǵy jáne Petropavl qalasynyń 29 jastaǵy turǵyny. Ekeýi de buryn buzaqylyq pen urlyq jasaǵandyǵy úshin sottalǵan. Uıymdasqan qylmysqa qarsy kúres basqarmasynyń qyzmetkerleri olardyń artemia salina shaıanynyń jumyrtqalaryn Taıynsha aýdanyndaǵy Qalybek tuzdy kólinde aýlaǵanyn anyqtady.

«Alynǵan artemia salina tsıstalarynyń jalpy salmaǵy 24 tonna, bul osyǵan deıin oblys aýmaǵynda alynǵan eń iri kólem. Balyq resýrstaryn, basqa sý janýarlaryn nemese ósimdikterdi zańsyz aýlaý faktisi boıynsha qajetti saraptamalar taǵaıyndalyp, sotqa deıingi tergeý júrgizilip jatyr. Qazaqstan Respýblıkasy Qylmystyq kodeksiniń 335-babyna sáıkes, kúdiktiler 3 jylǵa deıin bas bostandyǵynan aıyrylýy múmkin», - dedi SQO polıtsııa departamenti bastyǵynyń orynbasary Asqar Muhametqalıev.

Buǵan deıin SQO-da medıtsınalyq poıyz mamandary boıjetkennen týa bitken anomalııany anyqtaǵanyn jazǵan edik.