SQO-da ár adam aǵash otyrǵyzý aktsııasyna qatysa alady

PETROPAVL. QazAqparat – Soltústik Qazaqstan oblysynda turǵyndar aǵash otyrǵyzý aktsııasyna qatysa alady. Orman sharýashylyqtary arnaıy ýchaske bólip, kóshet jáne qajetti quraldarmen qamtymaq, dep habarlaıdy QazAqparat tilshisi.

SQO Tabıǵı resýrstar jáne tabıǵat paıdalanýdy retteý basqarmasynyń málimetinshe, 2014 jyldan bastap «Búkilqazaqstandyq aǵash otyrǵyzý kúni» aılyq formatynda ótkizilip keledi. Bul ólke tabıǵatyn qorǵap, saqtaýǵa jeke úles qosqysy keletin adamdardy biriktiretin jaqsy dástúrge aınalǵan.
«Bul paıdaly iske kez kelgen adam qatysa alady. Ekologııalyq aktsııalardyń ótkiziletin kúni men orny týraly áleýmettik jelilerde jarııalanady.
Aǵash otyrǵyzý aktsııasyn ótkizý úshin aýa raıy eskeriledi. Oblystyń memlekettik orman sharýashylyqtary ýchaskelerdi bóledi, jerdi daıyndaıdy, kóshettermen, qural-saımandarmen qamtamasyz etedi. Eriktilerge aǵashty qalaı durys otyrǵyzý kerektigi týraly nusqaýlyq beriledi», - deıdi basqarmanyń bólim mamany Sáýle Súleımenova.
Osyndaı is-shara Qyzyljar orman sharýashylyǵynyń Kýıbyshev ormanshylyǵynyń aýmaǵynda ótti. Eriktiler 1 gektar aýmaqqa 6 myń dana qaraǵaı ekti. Aktsııaǵa 60-tan astam adam qatysty, olar: SQO tabıǵı resýrstar jáne tabıǵat paıdalanýdy retteý basqarmasynyń, SQO orman sharýashylyǵy jáne janýarlar dúnıesi aýmaqtyq ınspektsııasynyń, SQO boıynsha ekologııa departamentiniń, «Tsentr kredıt» Bankiniń, «Qyzyljar orman sharýashylyǵy» KMM mamandary.
«Jalpy, ótken sáýir men mamyr aılaryna memlekettik orman sharýashylyqtary «Taza tabıǵat», «Birge taza Qazaqstan», «Bul meniń aǵashym» sııaqty 50 ekologııalyq aktsııa josparlaǵan.
Aktsııa aıasynda ózen-kólderdiń jaǵalaýlary, tabıǵat eskertkishteriniń aýmaqtary tazartylady, eldi mekender men mektep janyndaǵy aýmaqtardy kógaldandyrý, mektep túlekteriniń ataýly aǵashtardy otyrǵyzý, memlekettik orman qorynyń aýmaǵyn jınaý jáne abattandyrý sııaqty jumystar josparlanǵan», - deıdi Sáýle Súleımenova.