SQO-da alımentten 2,7 mln teńge bereshegi bar er adam sottaldy
SQO sotynyń málimetinshe, qylmystyq is kámeletke tolmaǵandar isteri jónindegi mamandandyrylǵan aýdanaralyq sotynda qaraldy. Sottalýshy P.-ǵa QR Qylmystyq kodeksiniń 139-shy baby «ata-ananyń kámeletke tolmaǵan balasyn kútip-baǵýǵa sot sheshimi boıynsha qarajat tóleý jónindegi mindetterin úsh aıdan astam oryndamaýy» boıynsha aıyp taǵyldy.
P. óziniń alımenttik mindettemeleri týraly bilgenimen, tólem jasaýǵa múmkindigi bolǵanymen, beresheginen qutylýǵa asyqpaǵan. Sot buıryǵyn oryndaý úshin eshqandaı shara qoldanbaǵan.
Saldarynan sottalýshynyń kámeletke tolmaǵan balany asyraýǵa alıment boıynsha qaryzy 2 766 387 teńgege jetken.
Prokýror sottalýshyny kináli dep tanýdy jáne bir jyl merzimge bas bostandyǵynan aıyrý jazasyn taǵaıyndaýdy surady.
P. kinásin moıyndady, aıyptaýǵa qarsy bolmady, bas bostandyǵyn shekteý túrinde jaza taǵaıyndaýdy ótindi.
Qylmystyń bul túrine alty júz saǵatqa deıingi merzimge qoǵamdyq jumystarǵa tartý, ne eki jylǵa deıingi merzimge bas bostandyǵyn shekteý ne sol merzimge bas bostandyǵynan aıyrý jazasy kózdelgen.
«Sottalýshy turǵylyqty jeri boıynsha teris sıpattalady, buryn osyǵan uqsas quqyq buzýshylyq úshin raqymshylyqqa baılanysty qylmystyq jaýaptylyqtan bosatylǵan, biraq odan sabaq almaǵan, balany kútip-baǵý jónindegi mindetten basqa, ony tárbıeleý jónindegi mindetterdi oryndamaıdy, balamen baılanysy joq, onyń taǵdyry men densaýlyǵyna qyzyǵýshylyq tanytpaıdy», — delingen sottyń habarlamasynda.
Sot P.-ni kináli dep tanyp, ony bir jyl merzimge bas bostandyǵynan aıyrdy. Er adam jazasyn qylmystyq-atqarý júıesiniń eń tómengi qaýipsizdik mekemesinde óteıdi.
Úkim zańdy kúshine engen joq.
Buǵan deıin Petropavl turǵyny sot arqyly alaıaqtyq jolmen aırylǵan 1 mln teńgesin qaıtaryp alǵanyn jazǵan edik.