SQO-da áli 103 myń adam vaktsına saldyrýy kerek – oblys ákimi
SQO ákimdiginde óńirdegi epıdemıologııalyq jaǵdaı boıynsha ótken otyrysta vaktsınatsııa máselesi de shet qalmady. Qazir oblysty 100 ekpe pýnkti jáne 55 jyljymaly brıgada jumys isteıdi. Emhanalar men aýrýhanalarda arnaıy mamandar jumyldyrylǵan. Alaıda sońǵy aıda ekpe alýshylar sany azaıyp ketkendikten, olardyń jaı turǵan kúnderi kóp.
«Sozylmaly aýrýlary barlar vaktsınalaýdan ótýge asyǵar emes. Jospar boıynsha 75,6 myń adam ekpe saldyrýy tıis. Onyń tek 53,3 myńy ǵana vaktsına qoıdyrǵan. Bul adamdar qater tobyna jatady. KVI-dan qaıtys bolatyndardyń da basym bóligi – osy sanattaǵy adamdar», - deıdi SQO densaýlyq saqtaý basqarmasy basshysynyń mindetin atqarýshy Nurlan Aımanov.
Mamannyń aıtýynsha, 60 jastan asqandarǵa aýrýdyń aldyn alyp, asqynýǵa jol bermeý úshin COVID-19-dan vaktsına alý qajet. Oblysta osyndaı 116 181 adam bar. Olardyń 54 myńǵa jýyǵy vaktsınanyń birinshi komponentin aldy. Múlde ekpe almaǵadar sany 62 myńnan asady.
«Vaktsınatsııadan ótkenderdiń arasynda koronavırýsty juqtyrǵandar bar, alaıda olar barlyq aýyrǵandardyń 1,3 % ǵana, ıaǵnı 3123 adam. Bul adamdardyń jartysyna jýyǵynda aýrý belgiler bolmaǵan. 55,2 %-y – 1724 adam statsıonarlarǵa jatqyzyldy. Olardyń 89-y ǵana jansaqtaý bólimshelerine tústi. Al endi salystyrý úshin aıtar bolsaq, bıyl 1 aqpan men 20 jeltoqsan aralyǵynda 11 082 vaktsına almaǵan adam statsıonarlarda em aldy. Al jansaqtaý bólimshelerinde vaktsınalanbaǵan 1626 adam jatty», - deıdi Nurlan Aımanov.
SQO ákimi Qumar Aqsaqalovtyń aıtýynsha, óńirde áli 103 myń adam vaktsınalaýdan ótýi tıis. Jalpy osy kúnge deıin SQO-da 251 388 adam tolyq kýrstan ótti.
«Bizde turǵyndar COVID-19-dan kúndelikti qaıtys bolyp jatyr. Adam óz otbasynda koronavırýspen betpe-bet kelip, jaqynynan aıyrylǵanda ǵana ýaqytynda tıisti sharalardy qolǵa alý qajettigin túsinedi. Qyzmet babyna baılanysty men otbasynda qaýipti ınfektsııadan týystary qaza tapqandarmen jıi kezdesemin. Olar biz aqyryn kúttik, ekpe alýdan qoryqtyq dep aıtady, al jaqyndarynan aıyrylǵanda ýaqytty ótkizip alǵandaryna, der kezinde vaktsına saldyrmaǵandaryna ókinedi. Biz olarǵa jetkilikti deńgeıde túsindirip aıta almadyq. Búgin barlyq emdeý mekemeleriniń bas dárigerleri kelip otyr, sizderden ekpe naýqanyn úlken jaýapkershilikpen ótkizýdi suraımyn. Sizderge jergilikti atqarýshy bılik ony tıisti deńgeıde tehnıkalyq jaǵynan uıymdastyrýǵa kómektesedi. Ókinishke qaraı vaktsınatsııa bizde sozylyp ketti. Oblys, el «qyzyl» aımaqtan «saryǵa» ótkenin jáne aýyrǵandar sanynyń azaıǵanyn kórip, halyq arqany keńge salyp, qaýip-qaterdi umyta bastady. Alaıda KVI juqtyrǵandar kúndelikti ómirden ótip jatyr. Sondyqtan jumysty jandandyrý kerek, ári alda mereke kele jatqanyn umytpaǵan jón», - dedi SQO ákimi Qumar Aqsaqalov.
Buǵan deıin sońǵy bes aıda COVID-19-dan 375 adamnyń aýyryp kóz jumǵanyn aıtqan edik.