SQO-da alǵash ret eresekterge arnalǵan saýyqtyrý lageri jumys istemek

<p>PETROPAVL. KAZINFORM &ndash; Soltústik Qazaqstan oblysynda bıyl balalardyń saýyqtyrý lagerinde eresekterdiń de demalýyna múmkindik jasalmaq. Jasy 30-dan asqandar balalyq shaqqa saıahat jasaıdy.&nbsp;</p>

«Aq qaıyń» balalardyń saýyqtyrý lageriniń dırektory Elena Mıroedovanyń aıtýynsha, eresekterge arnalǵan 6 maýsym 24 tamyzǵa josparlanǵan. Olar munda eki táýlikke jýyq bolyp, demalysty qyzyqty ótkizedi.

Foto: "Aq qaıyń" balalardy saýyqtyrý lageriniń ákimshiligi

«Eresekterge 6-maýsymdy ashý týraly ıdeıany ata-analar berdi. Demalyp jatqan balalaryna kelgen saıyn lagerde bastarynan ótken qyzyqty oqıǵalarymen bólisip, sol shaqty qaıtadan bastarynan ótkizgileri keletindikterin aıtty. Tańerteń kúnmen talasa oıanyp, túrli is-sharalarǵa qatysýǵa da qarsy emestikterin bildirdi. Nátıjesinde osy joba paıda boldy. 
Áleýmettik jeliden lagerge barǵysy keletin eresekterdiń kóptigin baıqadyq, qazir ótinish qabyldap jatyrmyz», - deıdi Elena Mıroedova.

Balalar lageri 170 adamdy qabyldaýǵa ázir. Joldama quny 22 myń teńge.

Foto: "Aq qaıyń" balalardy saýyqtyrý lageriniń ákimshiligi

«Balalarǵa arnalǵan baǵdarlamadan aıyrmashylyǵy bolmaıdy. Bes ret tamaqtandyramyz. Tımbıldıng, túrli fleshmob, «zarnıtsa» oıyny, taǵy basqa kóptegen is-shara, sonyń ishinde alaý basynda án aıtý jáne bı keshi de bar. Buǵan deıin 35+ degen shekteý qoıyp edik, suranystyń kóptigine baılanysty ony 30+ dep ózgertip jatyrmyz», - deıdi Elena Mıroedova.

Foto: "Aq qaıyń" balalardy saýyqtyrý lageriniń ákimshiligi

Esterińizge salaıyq, bıyl SQO Qyzyljar aýdanyndaǵy «Serebrıanyı bor» balalardyń saýyqtyrý lageri tasqynǵa baılanysty maýsymdy kesh bastap jatqanyn jazǵan edik. Sý astynda qalǵan nysan tolyq jóndeýden ótti.