SQO-da áleýmettik jeli arqyly jaqsy turmysyn kórsetken jigit qylmyskerlerdiń nazaryna ilikken

<p>PETROPAVL. KAZINFORM &ndash; Petropavlda qylmystyq top quryp, qorqytý, uryp-soǵý, bireýdiń múlkin tartyp alýmen aınalysqan tórt jigitke sot úkimi shyqty.</p>

SQO Polıtsııa departamenti baspasóz qyzmetiniń málimetinshe, uıymdasqan qylmysqa qarsy kúres basqarmasynyń qyzmetkerleri Petropavldyń bilim ordalarynda profılaktıkalyq kezdesý ótkizgen. Osyndaı is-shara barysynda jedel ýákilderge bopsalaýǵa ushyraǵan 18 jastaǵy stýdent júginip, kómek suraǵan. Bir top jigit osy jyldyń qańtar-aqpan aılarynda kolledj oqýshysynyń sońyna túsip, aqsha talap etken.

Jábirlenýshi 18 jastaǵy jigit óz ómirindegi bolyp jatqannyń barlyǵyn áleýmettik jelige júktep otyrǵan. Onyń jaqsy turmysy qylmyskerlerdiń de nazaryn aýdarǵan.

Nátıjesinde oblys ortalyǵynyń 20 men 23 jas aralyǵyndaǵy tórt turǵynyn polıtseıler ustady. Olardyń úsheýi buryn sottalǵan. Jedel aqparatqa sáıkes, olar jábirlenýshini jaldamaly páterlerge zańsyz jolmen qamap qoıý arqyly aqsha talap etken, psıhologııalyq qysym men kúsh kórsetken. Jábirlenýshige mobıldi qosymshalar arqyly májbúrli túrde nesıe alǵyzǵan. Sondaı-aq jigit óziniń sońǵy úlgidegi iPhone markaly uıaly telefonyn 50 myń teńgege satyp, aqshany bopsalaýshylarǵa bergen. Kezekti ret aqsha almaq bolǵan jigitter jábirlenýshiniń turǵylyqty mekenjaıyna kelgende, ol úıinde bolmaı shyqqan. Jastar jaldamaly páterge kirip, 70 myń teńge aqsha men gadjetterdi qýattaýǵa arnalǵan akkýmýlıatordy urlap ketken. Keltirilgen shyǵyn – 400 myń teńgeden asady. Budan bólek, olardyń mas kúıde basqa da qylmystar jasaǵany anyqtalyp, ol da sotta qaraldy.

Petropavl qalalyq soty ustalǵan tórt adamnyń úsheýin 8, 6, 4 jylǵa bas bostandyǵynan aıyrdy, al bireýine 4 jylǵa shartty túrde jaza kesti.

Buǵan deıin Jambyl oblysynda úsh adamdy aldap, 19 mıllıon teńgesin ıemdengen ınternet-alaıaq ustalǵanyn jazǵan edik.