SQO-da áleýmettik qyzmet kórsetý ortalyǵynyń dırektory qyzmetkerlerinen para alyp kelgen

<p>PETROPAVL. KAZINFORM &ndash; Petropavl qalalyq soty Presnov áleýmettik qyzmet kórsetý ortalyǵynyń dırektory Q.A.-ǵa jáne osy mekemeniń psıhıatry Q.M-ǵa qatysty úkim shyǵardy.</p>

Soltústik Qazaqstan oblystyq sotynyń málimetinshe, ortalyq dırektory Q.A. jalpy qamqorlyǵy úshin para alǵan, al osyndaǵy psıhıatr Q.M. para alý jáne para berýde deldaldyq jasaǵan.

Sotqa deıingi tergeý barysynda nevropatolog K.-dan jalpy somasy 1 814 000 teńge; psıhıatr Q.M.-dan jalpy somasy 1 041 000 teńge; psıhıatr B.-dan jalpy somasy 1 265 000 teńge aqsha túrinde para alǵan, al onyń 672 000 teńgesin Q.M. deldaldyq úshin alyp qalǵan.

Sottalýshylardyń kinási kýágerlerdiń aıǵaqtarymen jáne istiń jazbasha materıaldarymen dáleldengenimen, aıyptalýshylar taǵylǵan aıypty moıyndamady.

Sot Q.A., Q.M.-nyń jaýapkershiligi men jazasyn aýyrlatatyn mán-jaılardy anyqtaǵan joq.

Alaıda Q.A.-da jas balasynyń bolýyn, onyń densaýlyǵynyń jaı-kúıin, keltirilgen zııandy óz erkimen óteýin jazany jeńildetetin mán-jaılar retinde qarady.

Sot úkimimen Q.A. 5 jylǵa, al Q.M. 3 jylǵa bas bostandyǵynan aıyryldy. Olar jazany qylmystyq-atqarý júıesiniń ortasha qaýipsizdiktegi mekemesinde ótkeredi. Sondaı-aq sottalǵandar ómir boıyna memlekettik qyzmette laýazym atqarý quqyǵynan aıyryldy.

Buǵan deıin SQO-da úsh adamdy óltirdi dep aıyptalǵan kúdiktini alqabıler aqtap alǵanyn jazǵan edik.