SQO-da áleýmettik nysandardyń jartysynan astamy qysqy jylytý maýsymyna ázir

PETROPAVL. QazAqparat – Soltústik Qazaqstan oblysynda bıýdjettik mekemelerge 140 myń tonna kómir qajet bolsa, sonyń 32% jetkizildi, dep habarlaıdy QazAqparat tilshisi.

SQO energetıka jáne turǵyn úı-kommýnaldyq sharýashylyq basqarmasynyń málimetinshe, qysqa ázirlik qyzý júrip jatyr. Jalpy 500-ge jýyq qazandyq bolsa, sonyń 46% daıyn. 602 bilim berý nysanynyń 54%, densaýlyq saqtaýdyń 62% búgingi kúni qysqa ázirlendi.

«Qazirgi ýaqytta 351 avtonomdy qazandyqtyń 188 nemese 54% - y daıyndalǵan. Bıýdjettik mekemeler úshin 140 myń tonna kómir qajet. Sharttar jasaldy, qarjylandyrý bar. Kómir jetkizilip jatyr. Búginde 44,5 myń tonna nemese 32% ákelindi.

Budan basqa oblysta 24 ortalyq qazandyq bar, olar da qysqa ázirlikten ótýi tıis. Onyń 9-y - jekemenshik qazandyq», - deıdi basqarma mamandary.

Ortalyq qazandyqtar úshin qystan qysylmaı shyǵý úshin 59 myń tonna kómir qajet. Normatıvtik qor sharttarǵa sáıkes tamyz aıynda jáne jylytý kezeńi ishinde júrgizilmek.

Óńirde 1386 kópqabatty turǵyn úı bolsa, sonyń 34% jylytý júıesin jýyp-shaıyp, qysymmen tekserdi.

«1 shildeden bastap apta saıyn halyqtyń qatty otyndy daıyndaýyna monıtorıng júrgiziledi. Qys mezgilinde turǵyndar 419 myń tonna shamasynda kómir tutynady. Qatty otyn tuıyqtarǵa maýsym aıynan bastap túsirile bastady. Bul jumys jylytý maýsymy kezinde de júrgiziledi. Turǵyndar ázirge 82 myń tonna kómir nemese 20% daıyndady», - deıdi mamandar.

Oblys aýmaǵynda halyqqa jáne kommýnaldyq-turmystyq qajettilikterge kómir satý úshin 32 kómir tuıyǵy bar, onyń 4-ýi Petropavlda ornalasqan. Kómirdi bólshek saýdada tek 24 kásiporyn - 15 JShS jáne 9 jeke kásipkerlik júzege asyrady. Qazirgi ýaqytta, basqarmanyń málimetinshe, oblystyń tuıyqtarynda 38 myń tonna kómir bar, onyń ishinde Petropavl qalasynda 3,8 myń tonnasy jatyr.

Mamandardyń aıtýynsha, baǵany negizsiz ósirmeý úshin apta saıyn kómir qunyna monıtorıng júrgiziledi.

Kómir baǵasy kómir markasyna baılanysty tonnasyna 12,5-ten 20 myń teńge shamasynda satylyp jatyr. Ekibastuz kómiri 12,5 myńnan 14 myń teńgege deıin, Shubarkól 17 myńnan 19 myń teńgege deıin, Qarajyra 15,5 myńnan 20 myń teńgege deıin, Maıkóbe 15-18 myń teńge aralyǵynda saýdalanady.