SQO-da aqpanda MÁMS-ke 500 mln teńge aýdarym jasaldy

PETROPAVL. QazAqparat – Soltústik Qazaqstan oblysynyń turǵyndary mindetti áleýmettik medıtsınalyq saqtandyrýǵa aqpan aıynda 500 mln teńge tólem jasady, dep habarlaıdy QazAqparat tilshisi.

«ÁMSQ» SQO boıynsha fılıaly baspasóz qyzmetiniń málimetinshe, el boıynsha MÁMS-ke 44,7 mlrd teńge jarnalar men aýdarymdar túsken. Bul qańtar aıymen salystyrǵanda shamamen 10 mlrd teńgege artyq.

Qańtar aıyndaǵydaı aqpanda da jarnalardyń basym bóligi, ıaǵnı 24,5 mlrd teńgesi memleket tarapynan túsken.

Eske salaıyq, MÁMS aıasynda memleket áleýmettik osal 15 sanatqa kiretin azamattar úshin jarna tóleıdi.

Jumys berýshilerden túsken aýdarymdardyń mólsheri 13,5 mlrd teńgege jýyq. Al qalǵan azamattardyń jarnalary 6,7 mlrd teńgeni quraǵan.

SQO boıynsha jumys berýshiler jasaǵan aýdarymdardyń úlesi qańtar aıynda 231 mln teńge bolsa, aqpanda 198 mln teńgeni qurady. Qalǵan azamattardyń jarnalary osy aıda 167,6 mln teńgege jetse, qańtarda nebári 33,4 mln teńge bolǵan eken.

MÁMS-ke kelip túsken barlyq qarajat senimgerlik basqarý sharty boıynsha Ulttyq bankte saqtalady. Bul aqsha mindetti medıtsınalyq saqtandyrý paketi sheńberinde kórsetiletin qyzmetterdi tóleýge jumsalady.