SQO-da 78 mekteptiń 142 synyby qashyqtan oqýǵa jiberildi
SQO óńirlik kommýnıkatsııalar qyzmetinde oblystyq densaýlyq saqtaý basqarmasy basshysynyń orynbasary Qumar Kúsemisov óńirdegi koronavırýsqa qatysty jaǵdaıǵa toqtaldy.
«Jaǵdaı qıyn. Aýyrǵandar jáne aýrýhanaǵa túsetinder sany da artqan. Jańa «delta» shtamyna baılanysty balalar arasynda da koronavırýsty juqtyrý jıilegen. Qazirgi ýaqytta 242 bala dárigerlerdiń baqylaýynda, olardyń 24-i aýrýhanada em alyp jatyr, jaǵdaılary ortasha», - deıdi dáriger.
Qazirgi tańda oblysta koronavırýspen aýyrǵandarǵa arnalǵan 1600 oryn bar. 691 adam statsıonarlarda em alyp jatyr. Emdeý mekemeleri 43 %-ǵa júktelgen. Bólimshelerde 115 jansaqtaý oryndary bolsa, qazir onda 51 syrqat em alyp jatyr.
«Búginde úı karantıninde 1946 adam otyr. Olardyń 967-sinde dert jeńil ótse, 979-ynda aýrý belgileri joq. Aýrýmen kúrestiń tıimdi jáne jalǵyz joly – vaktsınatsııa. Oblysqa preparattyń 302 235 dana birinshi komponenti, 296 235 – ekinshi komponent jetkizildi. Óńirde osy kúnge deıin 246 030 adam birinshi komponenti aldy, bul jospar boıynsha egilýi kerek turǵyndardyń 66 %-y. Al tolyq kýrstan ótken turǵyndar sany - 227 856, bul jalpy jospardyń 61 %-y. Áli kúnge deıin vaktsınatsııanyń qajet ekenin túsinbegender bar. Biz ózimiz úshin ǵana emes, týǵan-týystarymyz, aınaladaǵy adamdar úshin de jaýaptymyz. Pandemııa – qoǵam máselesi. Sol sebepti halyqtyń basym bóligi ekpe alyp, ujymdyq ımmýnıtet qalyptastyrýy qajet», - deıdi Qumar Kúsemisov.
Mamandar oqýshylarǵa qatysty jaǵdaıǵa da toqtaldy.
«Sońǵy eki aptada 166 oqýshy koronavırýs juqtyrdy. Olarmen 1987 adam baılanysta bolǵan. 78 mekteptiń 142 synyby qashyqtan oqýǵa jiberildi. Mektepterde ustazdar da, oqýshylar da, basqa qyzmetkerler de maska kııýge mindettelgen. Oqý oryndarynda karantın talaptarynyń saqtalýy tekseriledi. Sońǵy aıda 11 jospardan tys tekseris júrgizildi, eki mektepte talaptardyń saqtalmaǵany anyqtalyp, 87 myń teńge aıyppul salyndy», - deıdi SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasov.