SQO-da 7 myńnan astam saıası qýǵyn-súrgin qurbany aqtaldy
SQO memlekettik arhıv dırektory Sáýle Málikovanyń aıtýynsha, óńirde osy kúnge deıin 7721 adamdy prokýratýra organdary aqtap, olar arhıvtiń málimetter bazasyna engizilgen.
Alaıda óńirde solaqaı saıasattyń kesirinen jazyqsyzdan «halyq jaýy» atanyp, áli kúnge deıin aqtalmaǵandar jeterlik.
Byltyr oblystyq arhıv qyzmetkerleri osyndaı 5 adamnyń qujattaryn taýyp, biraz jumys tyndyrǵan.
«SQO memlekettik arhıvi qazirgi tańda áli kúnge aqtalmaǵan saıası qýǵyn-súrgin qurbandarynyń elektrondy málimetter bazasyn jasaqtap jatyr. Sol kezde jazyqsyz sottalǵandardyń qujattaryn elimiz táýelsizdik alǵannan keıin oblystyq arhıv jarııa etti. Bul partııalyq qujattar, oblystyq basqarýshy organdardyń, oblystyq prokýratýranyń qujattary, túrli aqparlar, qazir osy málimettermen biz úlken jumys atqaryp jatyrmyz. 93-97 jyldary jumys istegen komıssııa 58 bap boıynsha sottalǵandardyń aty-jónin anyqtaýda bul qujattardy tolyq qaramaǵan. Biz arhıvtegi osy qujattardy negizge ala otyryp, osy 58-59 bap boıynsha otyrǵan adamdardyń qylmystyq isterin qarap jatyrmyz», - deıdi Sáýle Málikova.
Óńirlik arhıv dırektorynyń aıtýynsha, respýblıkalyq komıssııa aqtalmaǵandardy anyqtaýdyń metodologııasyn jasady. Bul qyzmetkerlerdiń jumysyn birshama jeńildetken.
Máselen, Ýálıhanov aýdanynda 1930 jyldardaǵy qylmystyq isterge qatysty qujattar tabyldy.
Olar osy bekitilgen ádis boıynsha aqtalmaǵandardyń tizimin jasap jatyr.
«Arhıvten 1921 jyly bolǵan «Esil kóterilisine» qatysty kóptegen qujat tabyldy. Bul oqıǵa óz baǵasyn áli kúnge ala almaı otyr. Kóteriliske qatysty 1921 jylǵy qujattar bizdiń arhıvte saqtalǵan. Oǵan qatysýshylardy aıaýsyz jazalaǵan. Bizde 200-den astam adamnyń tizimi bar, olar atylyp ketke», - deıdi SQO memlekettik arhıv dırektory Sáýle Málikova.