SQO-da 7 myń adam 42 500 teńge járdemaqy alýǵa ótinish berdi

PETROPAVL. QazAqparat – Soltústik Qazaqstan oblysynda tótenshe jaǵdaıǵa baılanysty tabysynan aıyrylǵan 7 myńnan astam adam 42 500 teńge járdemaqy alýǵa ótinish berdi. Bul jaıynda oblys ákimi Qumar Aqsaqalov jergilikti telearna arqyly aıtty, dep habarlaıdy QazAqparat tilshisi.

SQO ákimi Qumar Aqsaqalovtyń aıtýynsha, óńir turǵyndarynyń 3 myńyna tólem jasaldy.

«Prezıdenttiń bastamasymen qurylǵan «Biz birgemiz» qory halyqtyń áleýmettik turǵydan álsiz tobyna árqaısysyna jekeleı kómek kórsetedi. Oblystyń az qamtylǵan turǵyndaryna azyq-túlik paketteri men sanıtarlyq-gıgıenalyq zattary taratyldy. Barlyǵy 1252 jınaq úlestirilse, onyń 596 Petropavl qalasynda berildi. Aktsııa alda jalǵasyn tabady. Muqtaj jandarǵa qarjylaı kómek te kórsetilmek. 50 myń teńge mólsherinde materıaldyq kómek olardyń esepshottaryna aýdarylatyn bolady», - dedi Qumar Aqsaqalov.

Oblys ákimi sýpermarketterdiń jetkizý qyzmetin jetildirip jatqandyǵyn aıtty. Qazirgi tańda «Semeınyı» men «Severnyı» saýda jelilerine tapsyrys berýshiler sany artqan. Sol sebepti kompanııalar shtat sanyn ulǵaıtty.

«Petropavlda azyq-túlikti jetkizý 24 saǵat jumys isteıdi. Bul jumystarǵa basqa sýpermarketterdi de tartyp jatyrmyz. «Magným» tapsyrys qabyldaıtyn chat ashady. Al «Pıramıda» vokzal mańyndaǵy aýdan turǵyndarynan tapsyrys alady», - dedi óńir basshysy.

SQO ákimi Qumar Aqsaqalov sondaı-aq endi dene qyzýy bar turǵyndardyń sýpermarketterge kirgizilmeıtindigi jóninde aıtqan edi.