SQO-da 7 aýyl jabylyp qaldy

<p>ASTANA. KAZINFORM&nbsp;&mdash; Soltústik Qazaqstan oblysynda esh&nbsp;adam turmaıtyn 7 aýyl jabyldy, taǵy 38 eldi mekendegi az&nbsp;turǵyndy basqa jaqqa kóshirý josparlanýda. Bul týraly oblys ákimi Ǵaýez Nurmuhambetov aıtyp berdi.</p>

— Búginde bizdiń oblystaǵy 635 eldi mekenniń 141-inde turǵyndar sany elýge de jetpeıdi. Ókinishke qaraı, 38 eldi mekende adam sany 10-nan da az, al 7 eldi mekende eshkim turmaıdy. Bul eldi mekender kezinde ońtaılandyrylmaǵan. Sondyqtan búgin máslıhat sessııasynda turǵyndary joq okrýgter boıynsha sheshim qabyldanyp, bul aýyldar resmı túrde taratyldy, — dedi oblys ákimi Ortalyq kommýnıkatsııalar qyzmetinde ótken brıfıngte.

Al halqy óte az 38 eldi meken boıynsha aýdan ákimderi bul aýyldardy ońtaılandyrý jóninde tapsyrma aldy.

— Bul jumys óte muqııat júrgiziledi, jaı ǵana jaryqty óshirip, joldy jaýyp tastaý emes, árbir turǵynmen jeke jumys isteý, jumys berýshilermen kelisip, jaǵdaı jasaý, baspana satyp alý, ony jóndeý, kóshirip, jańa jaǵdaı jasaý arqyly júzege asyrylady. Adam únemi jaqsy jer izdeıdi, sondyqtan biz adamdardy tirek jáne bolashaǵy bar aýyldarǵa kóshirý úshin bar jaǵdaıdy jasaýǵa tyrysamyz, — dedi Ǵ. Nurmuhambetov.