SQO-da 67 kóp qabatty úıdiń turǵyndary pesh jaǵyp, kúl shyǵarmaıtyn boldy

PETROPAVL. QazAqparat – Soltústik Qazaqstan oblysynda byltyr kóp qabatty 60 úı jylytý júıesine qosylsa, bıyl taǵy 67 úıge ortalyqtan jylý beriledi, dep habarlaıdy QazAqparat tilshisi.

SQO ákimi Qumar Aqsaqalov áleýmettik jelidegi paraqshasynda atqarylǵan jumystar jaıynda esep berip, josparymen bólisti.

«Biz aýyldardaǵy kópqabatty úılerdi ortalyq jylytý júıesine qosý boıynsha maqsatty jumysymyzdy jalǵastyryp kelemiz. 2020 jyly 60 kópqabatty úı qosyldy, onda 2 myńnan astam adam turady.

Bıyl biz jylý jelilerin qalpyna keltirip, Qyzyljar, Aqjar, Aıyrtaý, Mamlıýt jáne Esil aýdandaryndaǵy taǵy 67 kópqabatty úıdi qosamyz. 2 myńnan astam aýyl turǵyny qysta peshti jaǵý jáne kúl shyǵarýdy umytady.

Sondaı -aq oblysta Saýmalkól, Talshyq jáne Aryqbalyq aýyldarynda jańa ortalyq qazandyqtar salyndy. Novoıshım aýylynda 7 myń adamdy jylýmen qamtamasyz etetin ortalyq qazandyqtyń qurylysy bastalady», - dep jazdy Qumar Aqsaqalov.

Ákimniń aıtýynsha, qazir oblysta 684 kópqabatty úı bar, onyń 233-i, ıaǵnı 34 % ortalyqtandyrylǵan jylýǵa qosylǵan. Bul joba kelesi jyly da júzege asyp, taǵy birneshe ondaǵan úıdi jylytý júıesine qosý josparlanǵan.

Buǵan deıin Petropavlda qysqy jylytý maýsymyna daıyndalmaǵan kóp qabatty úılerdiń jylytý júıesine qosylmaýy múmkin ekendigin aıtqan edik.