SQO-da 61 adam ómir boıyna kólik júrgizý quqyǵynan aıyryldy

PETROPAVL. QazAqparat – Byltyr Soltústik Qazaqstan oblysynda kólik júrgizý quqyǵynan aıyryla tura, rýlge qaıta otyrǵan 72 júrgizýshi ustalyp, olardyń 61-i kólik basqarý múmkindiginen ómir boıyna aıyryldy, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, Petropavlda patrýldik polıtseıler Trýd kóshesinde «VAZ 2114» avtokóligin toqtatqan. Tekseris barysynda 33 jastaǵy júrgizýshiniń buryn mas kúıde ustalǵany úshin 3 jylǵa kólik basqarý quqyǵynan aıyrylǵany anyqtaldy. Medıtsınalyq kýálandyrý onyń bul joly da mas bolǵanyn kórsetti.

Kólik salonynda jolaýshy bolǵan. Er adamdar ortaq tanystarymen ishimdik ishken bolyp shyqty.

Atalǵan fakti «Kólik quraldaryn basqarý quqyǵynan aıyrylǵan, alkogoldik, esirtkilik jáne (nemese) ýytqumarlyq masań kúıdegi adamnyń kólik quralyn basqarýy, sol sııaqty kólik quralyn osyndaı adamnyń basqarýyna berý nemese kólik quralyn osyndaı adamnyń basqarýyna jol berý» baby boıynsha Sotqa deıingi tergep-tekserýlerdiń biryńǵaı tizilimine engizildi.

«Bundaı jaǵdaılar jıi kezdesedi. Petropavl men M. Jumabaev aýdanynda 30 qańtardan bastap osyǵan uqsas taǵy eki fakti anyqtaldy. Zań talaptaryn elemeýge jol berilmeıdi. Patrýldik polıtseıler osyndaı faktilerdi anyqtaý boıynsha reıdtik is-sharalar júrgizedi», - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.

Byltyr polıtseıler júrgizý quqyǵynynan aıyrylǵan 72 mas júrgizýshini qaıta ustap, sotqa materıaldar tapsyrǵan. 65-ine sot úkimi shyqty. Tórteýiniń úsh jyl merzimge júrgizý quqyǵy shekteldi, óıtkeni olar jaza qatańdatylǵanǵa deıin zań buzǵan. 61 júrgizýshi ómir boıyna júrgizý quqyǵynan aıyryldy.