SQO-da 530-ǵa jýyq mal qorymynyń biri de talapqa saı kelmeıdi

PETROPAVL. QazAqparat - Soltústik Qazaqstan oblysynda 529 mal qorymy bolsa, olardyń bir de biri sanıtarlyq talapqa saı kelmeıdi, dep habarlaıdy QazAqparat tilshisi.

SQO Veterınarııa basqarmasynyń málimetine súıensek, óńirde 529 mal qorymy bar. Onyń 17-si tıptik bolsa, qalǵan 512-si qarabaıyr jasalǵan. ıAǵnı, sanıtarlyq normalarǵa saı emes.

«Ólgen mal qazylǵan shuńqyrǵa tastalady. Ordyń shetteri opyrylyp qulap jatyr. Qaradúrsin qorshalǵan, saldarynan ıtter ólekseni súırep shyǵaryp, qorektenedi. Al, bul aýrýlardyń taralýyna ákeledi. Aýdandarǵa mal qorymdarynyń jaǵdaıy belgili. Alaıda, bir de bireýi onyń qurylysyna bir tıyn da qarjy bólgen joq», - deıdi oblystyq Veterınarııa basqarmasynyń basshysy Altynbek Abdollaev.

Veterınarlyq zańnama boıynsha, mal sharýashylyǵymen aınalysatyn aýylsharýashylyq qurylymdary mal qorymdaryn salýǵa mindetti. Degenmen, bul talap oryndalmaı keledi. Mamandardyń aıtýynsha, ár aýdanda veterınarlyq-sanıtarlyq talaptarǵa saı keletin eń kemi eki mal qorymyn salý qajet.

Budan buryn habarlaǵanymyzdaı, SQO-da qaýipti sozylmaly mal aýrýlarynyń 17 oshaǵy bar.