SQO-da 50 shaqty elikti atqan qylmystyq topqa sot úkimi shyqty

<p>PETROPAVL. KAZINFORM &ndash; Petropavl qalalyq soty 53 elikti atqan tórt brakonerdi sottady.&nbsp;</p>

Soltústik Qazaqstan oblystyq soty baspasóz qyzmetiniń málimetinshe, 12 aqpan kúni Petropavl qalalyq soty Gr., Gn., J., Z.-ǵa qatysty qylmystyq isti qarady. Olarǵa qylmystyq top quryp, zańsyz ańshylyqpen aınalysty degen aıyp taǵylǵan edi.

Gr. degen qylmystyq top quryp, onyń quramynda Gn., J., Z. 2022 jyldyń kúzinen 2023 jyldyń 27 aqpanyna deıin qarý-jaraq pen avtokólikti paıdalanyp, Petropavldyń mańynda zańsyz ań aýlaǵan. Osylaısha 53 sibir eligin atyp alǵan. Saldarynan SQO orman sharýashylyǵy jáne janýarlar álemi aýmaqtyq ınspektsııasyna 68 mln teńgeden astam shyǵyn keltirgen.

Sottalýshylardyń kinási tolyq dáleldendi. Alaıda Z. óz kinásin moıyndamaı, aqtaýdy surady. Gr., Gn., J.-de kinásin moıyndamaı, jazany jeńildetýdi surady.

QR Qylmystyq kodeksiniń 262 baptyń 1-2 bóligi - uıymdasqan top, qylmystyq uıym qurý jáne olarǵa basshylyq etý, sol sııaqty onyń qyzmetine qatysý boıynsha jaza 5 jyldan 10 jylǵa deıin qarastyrylǵan.

QR Qylmystyq kodeksi 337 bap – zańsyz ańshylyq boıynsha sanktsııa 6 jyldan 10 jylǵa deıin bas bostandyǵynan aıyrý jazasyn kózdeıdi.

Petropavl qalalyq soty Gn., J., Z.-nyń kishkentaı balalary baryn jazany jeńildetetin jaǵdaı dep qarady. Gr.-nyń qylmysty birneshe ret jasaýy, qylmystyq top qurýy – jazasyn aýyrlatty.

Nátıjesinde Gr. 11 jylǵa sottaldy. Ol qylmystyq atqarý júıesiniń maksımaldy qaýipsizdik mekemesine ornalastyrylady. Qalǵan úsheýi - Gn., J., Z. 8 jylǵa bas bostandyǵynan aıyryldy, olar jazasyn ortasha qaýipsizdik mekemesinde óteıtin bolady.

Sondaı-aq sottalǵandar ańshylyqpen aınalysý quqyǵynan aıyryldy.

Sot úkimi zańdy kúshine engen joq.