SQO-da 5 jylda 14 mlrd teńgege eki myńnan astam medıtsınalyq qondyrǵy alyndy

PETROPAVL. QazAqparat – Soltústik Qazaqstan oblysyndaǵy balalar aýrýhanasynda búgin zamanaýı kompıýterlik tomograf iske qosyldy, dep habarlaıdy QazAqparat tilshisi.

SQO ákimi Qumar Aqsaqalov balalar aýrýhanasynda bolyp, jańa qondyrǵynyń jumysyn kórdi.

«Osydan birneshe jyl buryn turǵyndar kompıýterlik tomografııanyń jetispeıtinin, uzyn-sonar kezek máselesin kótergen bolatyn. Biz bul máseleni birtindep sheship kelemiz. 2017 jyldan bastap tomograftardyń sany 4-ten 8-ge deıin ulǵaıtyldy.

Búgin balalar aýrýhanasynda jańa kompıýterlik tomografııa iske qosyldy. Jýyrda Petropavl qalalyq kópsalaly aýrýhanada taǵy bir KT kabıneti ashylady. Qoldanystaǵy apparattardy 1-shi qalalyq aýrýhana men Músirepov aýdandyq aýrýhanasyna jiberdik», - dedi Qumar Aqsaqalov.

Óńir basshysynyń aıtýynsha, sońǵy bes jyl boıy óńirdiń emdeý mekemeleri zamanaýı medıtsınalyq jabdyqtarmen tolyǵyp jatyr. Osy aralyqta bul maqsatqa 14 mlrd teńge bólindi. 2 myńnan astam qondyrǵy alyndy.

«Angıograf, mammograf, ÝZI, rentgen apparattarynyń tapshylyǵy máselesi oblysta tolyǵymen sheshildi. Aýrýhanalar men emhanalardy standart boıynsha jabdyqtaýǵa bizge 4 ÝZI apparaty kerek edi. Ótken jyly ekspert klasty 11 ÝZI apparaty satyp alynyp, másele sheshildi», - dedi SQO ákimi.