SQO-da 5 balany baýyryna basqan otbasy ulttyq baıqaýda jeńiske jetti

PETROPAVL. QazAqparat – Soltústik Qazaqstan oblysynda «Mereıli otbasy» ulttyq baıqaýy óńirlik kezeńiniń jeńimpazy Kreıdýnder 5 mln teńgeniń sertıfıkatyna ıe boldy, dep habarlaıdy QazAqparat tilshisi.

SQO-da «Mereıli otbasy» ulttyq baıqaýynyń oblystyq kezeńine 17 jeńimpaz otbasy qatysty.

Bas júlde Shal aqyn aýdany Olgınka aýylyndaǵy Kreıdýn kópbalaly otbasyna buıyrdy.

Otaǵasy Sergeı Kreıdýn sharýa qojalyǵynda mehanızator bolyp jumys isteıdi.

Zaıyby Inna Andreevna - 30 jyldan beri bastaýysh synyp muǵalimi. Olardyń shańyraq kótergenderine 30 jylǵa jýyq. Tuńǵyshy Andreı men qyzy Vıoletta er jetken, óz aldyna otaý qurǵan.

«2017 jyly «Patronattyq otbasy» baǵdarlamasy boıynsha biz bes balany tárbıemizge aldyq. Olar: Lıýbov, Valentına, Petr, Margarıta jáne Veronıka. Bul sheshimge eshqashan ókingen emespiz, olar bizdiń óz balamyzdaı bolyp ketti», - deıdi otanasy Inna Kreıdýn.

Andreı qosalqy sharýashylyqpen aınalysady, Vıoletta – tárbıeshi, Lıýbov 2-kýrs stýdenti.

Valentına, Margarıta, Veronıka jáne Petr mektepte oqıdy. Olardyń barlyǵy qazaq tilin erkin meńgergen.

«Balalarymyzdy maqtan tutamyz. Biz balaǵa ómir syılasaq, olar bizdiń ómirimizdiń maǵynasy. Búgin oqý, mamandyq alý, bolashaqty josparlaý múmkindigin bergeni jáne bizdiń otbasymyzdy qoldaǵany úshin úlken alǵys aıtqym keledi. Ómirdiń qundylyqtaryn baǵalaý óte mańyzdy», - deıdi Inna Kreıdýn.

SQO ákimi Qumar Aqsaqalov Kreıdýn otbasyna músinshe, Memleket basshysynyń dıplomyn, baıqaýǵa qatysqany týraly estelik dıplom men 5 mln teńgeniń aqshalaı sertıfıkatyn tabys etti.