SQO-da 46 myńǵa jýyq turǵyny bar 226 aýylda taza sý joq

PETROPAVL. QazAqparat – Soltústik Qazaqstan oblysynda bıyl eldimekenderdi sýmen qamtýdy jaqsartý maqsatynda 12,3 mlrd teńge bólindi. Nátıjesinde jyl sońyna deıin 22 aýylǵa taza sý kelmek. Taǵy 33 eldi mekende bastalǵan jumystar keler jyly aıaqtalmaq, dep habarlaıdy QazAqparat tilshisi.

SQO ákimdiginde eldi mekenderdi sýmen qamtý máselesine arnalǵan jıyn ótti.

Energetıka jáne turǵyn úı-kommýnaldyq sharýashylyq basqarmasy basshysynyń mindetin atqarýshy Pavel Shılovtyń aıtýynsha, qazirgi ýaqytta óńir eldi mekenderiniń 64,4 % - 409 aýyl ortalyqtandyrylǵan sý jelisine qosylǵan.

Munda aýyl halqynyń 84 % nemese 240,5 myń adam turady.

«Oblysta sýmen qamtylmaǵan 226 eldi meken bar. Munda 45,8 myń adam turady. Máseleni sheshý úshin jyl saıyn tıisti jumystar atqarylyp jatyr. 2011-2020 jyldar aralyǵynda 2,4 myń km qubyr tartyldy, osy maqsatqa 46,6 mlrd teńge jumsaldy. Nátıjesinde 62 aýylǵa taza sý jetti. 259 eldi mekendi sýmen qamtý jaqsartyldy. Byltyr osy salany damytýǵa 10,3 mlrd teńge jumsalsa, bıyl 12,3 mlrd teńge bólindi», - deıdi Pavel Shılov.

Mamannyń aıtýynsha, bul qomaqty soma 55 eldi mekenge jumsalmaq. Nátıjesinde 12 eldi mekende sýmen qamtý júıesi jaqsarady, 10 aýylǵa taza sý kelmek, al qalǵan 33 eldi mekende bastalǵan jumystar keler jyly aıaqtalady.

200 km jeli jańadan salynyp, jańǵyrtylýy kerek bolsa, sonyń 189 shaqyrymy tartyldy. 2 myń turǵyn sýdy úıge deıin kirgizýge múmkindik almaq, olardyń 600-den astamy ony paıdalanyp otyr.

«Memleket basshysynyń tapsyrmasyn oryndaý úshin oblystyń qalǵan 229 aýylyn sapaly sýmen jabdyqtaý boıynsha jospar ázirlendi. Onyń aıasynda 2026 jyldyń basyna deıin bul másele tolyq sheshiledi.

Josparda 18 aýylda sýmen jabdyqtaý nysandaryn salý jáne rekonstrýktsııalaý; 164 aýylda keshendi blok-modýlderdi ornatý jáne 47 aýylda toptyq sý qubyrlaryn jańǵyrtý kózdelgen», - deıdi Pavel Shılov.