SQO-da 440-taı adam «Jasyl el» jasaqtarynda eńbek etýde

ASTANA. QazAqparat - Soltústik Qazaqstan oblysynyń «Jasyl el» jasaqtary orman sharýashylyqtarynda aǵash otyrǵyzady, olardy kútip-baptaıdy. Mundaı jumys 12 ga aýmaqta atqarylyp jatyr.

Stýdentter sonymen qatar, jabaıy janýarlar úshin qysqy merzimge azyq daıyndaıdy. Qazir 6 myńnan astam sabaqty jem-shóp ázirledi. 

Odan bólek, jasyleldikter orman kólemin mólsherleýmen aınalysady. Jastardyń kómegimen 1000 gektardan astam orman kólemi mólsherlendi,  syrǵaýyldar daıyndaldy, 3 ga astam aýmaqta qorshaý jóndeldi.

«Jasyl el» ókilderi 300 keliden astam qaıyń tuqymyn daıyndady, 100 gektardan astam ormandy qoqystan tazartty.  Shamamen 2 km aýmaqty jınastyrdy. Órt qaýipsizdigi maqsatynda 5 500 qylqan japyraqty aǵashtyń butaqtary kesildi.

Sonymen qatar, stýdentter tuqym qoımalaryn jóndeýge jáne daıyndaýǵa, orman mekemeleriniń aýmaqtary men ónerkásiptik ǵımarattardy tazartýǵa qatysady.  Jasaq músheleri  memlekettik orman qorynyń 2 000 gektarynda jumys atqardy.

«Jasyl el» músheleri 12 orman sharýashylyǵy memlekettik mekemesine ornalastyryldy. Belsendilerge jalaqy tóleý úshin jergilikti  bıýdjetten 9,5 mln teńge bólindi. Qarajat esebinen 323 jas eńbekpen qamtyldy. Taǵy 112 jasqa jalaqyny Petropavlda kógaldandyrý jáne abattandyrý jumystarymen aınalysatyn kásiporyndar tóleıdi.